AI: Leuengees

AI

Leuengees

*

Ai! AI, jou kop is meer deurmekaar

as die ou se kop wat jou intelligensie

probeer ontwerp het sonder enige greintjie

van enige logiese konsep

van die arme versukkelde lewe.

¨

Jou nering is: om te dink,

om elke menslike integriteit

te kaap tot jou eie egoïsme,

ʼn blikbrein wat ook nie kan

eksisteer sonder menslike invloed.

¨

Jou brein en my Godgegewe gawe

is geensins op dieselfde frekwensies

van emosionele wedervarings

wat enigeen tot trane dryf

en weer kan heel.

¨

Jou nering is om almal tot raserny te dryf,

en die arme siel tot in die helse hel…

wanneer ek iets wil kopieer; sê jy nee

wanneer ek iets wil uitvee; sê jy nee

jy wil namens my kies wat om te lees.

¨

AI, jy’s ʼn leuengees sonder skaamte

ja, ongelukkig het die moeë mens

fataal gefaal in eie lui- en laksheid

hy het ankerloos en dinkloos geword

en jy AI, het hom verslind met g’n vrees.

*

©Arnold.

3 Des. 2024 om 15h00

Foto krediet. Pavel Danilyuk.