Theresa Postma
Desember 2019 – Dans asof niemand kyk nie projek
1.Ekkerigheid
Ek lees die woord raak in een van Berdéhand Brand se gedigte. Ekkerigheid. Oombliklik kom ek tot ʼn skokkende besef. Ekkerigheid is ook die ongedurigheid binne my, die afsondering, die rusteloosheid wat nie wyk wil kry nie. Dit lê soos ʼn stuk klipperaarde tussen my en Abba Vader. En ek val op die grond. “Here,” pleit ek, “vergewe my”. Ek het my geesdrif verloor, met die swaarkry-tyd verstrengel geraak. My oë op die pyn gerig. Alles gaan oor my, nie meer God nie.
Dié woord bring ʼn kopskuif, en daarna kalmte. Die plek waar ek myself bevind het mag miskien ‘n geestelike niemandsland wees, maar my Here kén my. Hy het nooit van my vergeet in die seer stiltes nie. Dinge werk uit soos dit moet. “Kyk, Ek maak alles nuut.”
My hart is versterk. En ek dans op die lied van Sy liefde, ek dans soos ʼn steenbok in ʼn haak-en-steek-savanne, soos ʼn klipblom tussen die krake van ʼn rotshang. Ek dans en dans soos ʼn bateleur teen bergbloutes.
Theresa Postma
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...