Cornien

Lees meer bydraes deur Cornien

BRONS KLAS 

Amakeia

2.Awendster vir Amakeia

Ek roep jou naam, deur die berg klowe – Amakeia
en al wat terugkeer is … eia, eia, eia,
soekend wandel ek langs die dig begroeide bospaadjies,
soek ek iets van jou, agter elke struik en gaatjie.

Op my tog verdwaal ek tussen witstinkhout en geelhout bome
wat majestueus pronk aan die voet van die groot Amatola-berge
en daarnaas slang kronkel die kei-rivier nogsteeds –
verborge sy geskiedenis van iets so wreeds.

Verbeel ek my – ek hoor jou saggies neurie …
alhoewel die natuur hom nie daaraan steur nie,
dan … sien ek jou skim, moederlik met die kleintjie
op jou rug, sing jy saggies jou rympie….

“Wees stil my kind,
wees stil my baba…”

Verseker jy die kleinding sy pa sal tuis wees met dagbreek
wyl assegaai diep in jul hart steek …
dat ‘n ster hom huistoe sal lei
voor die doodsengel sy sin kon kry.

Dan verdwyn jou wasige beeld
nadat Maxosas die verhaal verseël
met hul onheils lag
op die grens van die nag.

Jou heilige belofte lê nog steeds op die altaar …
wandel jou plig die tog elke jaar,
beskerm jy jou nonna se kind
en wag om die laaste awendster te vind.

@ Cornien

Projek Liefde vir Afrikaans

2.My trots my taal 

Van moederskoot ken ek jou…
in kleutersang en troetel woord,
strompel jy hink-hink tot skoene groot.

My taal… Afrikaans, jy’s lieflik in klank,
hoe meer ek van jou leer, hoe meer wil ek weet,
so laat my toe om jou te ontleed.

Jou suiwer prag en praal is skaars
soos eeue oue skatte verborge in bestaan
moet ons keer dat jy nie in tyd vergaan.

Jy’s volks besit in jou skugter roem
en pronk pragtig in digterstaal
en vele spannings volle verhaal.

So luier op elk’ gewillige tong – my taal,
kosbaar is jou klank wyl ons in jou spore dwaal.

@Cornien

Julie 2020 – Klanknabootsingprojek

3.U stuur ‘n lemoenduifie

ek sit op my draadstoeltjie “bo-op” die sementbraai
sodat my oë aan die horison kan hang –
om te sien tot dáár waar uitkyk sy bloute kleur
en die spikkelbome sonstrale vang

maar hier deur die laagte,
sug my gemoed soos koue mis
en vou sy vingers om my benerige siel
terwyl alleen sy skoene uitskop
en hom tuismaak hier langs my nis*

dan sien ek hom…

ʼn klein lemoenduifie skaars twee meter van my af
koer-koer so asof hy sê “maar Ek is hier, maar Ek is hier”

© Cornien Naudé
31 Julie 2020

*nis – “Hy het sy bes probeer om iewers ‘n nis te kry waar hy kon tuis voel”

Augustus 2021 – As die blare val projek

2.Die laaste blaar het geval

dit was herfs my lief, daai jaar…
en son was lui om vroeg op te staan
so ons voetspore het verdwaal
onder al die blaar massas
en jy, jy het vir ewig verhuis, daai jaar
en ons onthoutjies het yl gehang
soos hande teen die grys-grou hemel
wyl wind sy treursang treurig gesing het
en boom se arms my gedagtes gesus het
het die gevalle blare saam gedans op die maat
gewarrelwind, getol en gehink-en-pink
tot wind gaan lê het
en son die oosterkim roesrooi gekleur het
het ons laaste blaar geval

©Cornien Naudé

 

November 2023 – OOP projek

2.liewe vreemdeling

ek het langs jou gesit vandag
en my oë het oor jou gevoel
en my hart het versag
want my verdwaalde lag
het lêplek gekry
hierdie November dag

Cornien Naude

 

SILWERKLAS

Desember 2023 – Veldslag projek

2.Wapenstilstand – Kersfees 1914

 

dis oukersaand,

 

soldate sit sy aan sy in die modderige

loopgrawe van die Niemandsland

iewers tussen Frankryk en Belgie

veg Fransman, Brit en Duitser vir sy land

 

sombernis en koue klou genadeloos

aan elk’ soldaat se hart,

dis amper Kersfees en geliefdes ver

met slegs ʼn kiekie teen die bors

verlang elkeen alleen, alleen elkeen

 

dan antwoord die heilige uur –

stille nacht, heilige nacht

alles schlaeft, einsam wacht…

hul neurie saam en voor stiltes daal

sing elke land in sy eie taal

 

met dagbreek se gloed

brons vrede en heiligheid

aan elk’gevriesde grashalm

aan elk’ gevriesde hart

 

eers waai hul en lig ʼn bord

met geseënde Kersfees in sy taal

dan klim hul behoedsaam uit hul loopgrawe

en groet mekaar soos broeders

 

hul ruil hul kosbare –

met smaaklose beskuit en sigarette

en kuier saam met vaaitjies bier

en akkoord om hul gevalle makkers

te begrawe voor hul skaterend sokker speel

 

maar die vrede verbrokkel met nuwejaar

toe ʼn enkele skoot klap en ʼn soldaat dood

en broederskap verdwyn toe vyandskap baar

 

bykans agtien miljoen, hetsy soldaat of gewoon

het sy lewe gegee vir volk en vaderland

en nog nooit kon geskiedenis hom herhaal

toe vyand en vyand soos vriende gegroet het

en saam die heiligheid van Kersfees gedeel het

 

© Cornien Naudé

*Neologisme – sombernis

 

Januarie 2024 – OOP Projek

2.Liefde nie in grysheid vergeet

 

ons hande is beaard met wysheid

en ons hoof ʼn stralekrans van grysheid

maar ons woorde is sag met dankbaarheid

met die besef van ons verganklikheid

 

hierdie dag ʼn veraltyd, jul weet

want kosbaarheid ken geen leed,

jul hemelse meetsnoere is gemeet

want jul Abba Vader het geweet

 

ʼn sagte hart baar liefde ongevraagd,

ʼn sagte woord keer die grimmigheid af,

sonder die lewenssout is alles laf

en sonder die liefde is niks geraak

 

vou jul hande toe in gebed

en laat jul oog op die samesyn let

want liefde is kosbaar, jul weet

en word nie in grysheid vergeet

 

© Cornien Naudé

6/01/2024 / Opgedra aan David en Hensie met hul troudag.

 

JUNIE 2024 – ONBEKENDE PROJEK

2.Ons asem bestaan

 

ʼn spikkelpunt ons asem bestaan

in hierdie grote heelal

het ons kindervoetspore vooruit

met ʼn malle gejaag

en los ons met oumens oë in die spieël

oë kaalgesteel deur roetine

en die bekende vervalle en vergaan

sonder kinderlag en kinderspeel

en strate en gesigte bouval

in ons spikkelpunt bestaan

ons toekoms onbekend

en kindwees

na wie-weet-waar

versend

 

© Cornien Naudé

 

 

 

(3)