EK KAN………in my TAAL!
Uniek is my taal. Afrikaans is my taal. Ek kan verduidelik, omskryf, besluit of verskoning vra in my taal. En as ek kwaad is, kan ek stry en vuur spoeg in my taal….donner, bliksem, wetter.
Ek kan liefhê en liefde uitdeel. Ek kan jammer kry en simpatie gee. Ek kan parmantig wees en afjak in my taal. Maar een ding wat ek nie in my taal kan doen nie, is stilstuipe pleeg. My taal is luid en jolig en voorbarig en uitgesproke. Voor op die wa en veelseggend. Maar nooit ooit stil nie.
Ek kan bid in my taal, soos Chris Chameleon. Ek kan smeek en belowe en protesteer en mooi vra en ooreenkoms sluit in my taal. Ek kan loof en prys en verhef, maar ek kan ook skel en verpletter en vernietig.
Ek kan Kalfie-wals en trippe-trappe-trone. Ek kan vastrap en sokkie-sokkie. Heng, ek kan selfs Rock in my taal, sê Karen Zoid. Gee my ’n bekfluitjie en ’n konsertina en ek kan opskop en balke-toe. Tiekiedraai! Alles in my taal.
Beter as enige iets anders, kan ek eet in my taal. Souskluitjies, melktert, boerbeskuit. Bobotie, koesisters en springbokbiltong. Lamsboud, boerewors, waterblommetjiebredie en kerrie skaapafval. Appelkooskonfyt, tamatiekonfyt en moskonfyt.
Om dit af te sluk in my taal, brandewyn, mampoer, bitterbessiesous of sommer net lekker sterk moerkoffie en plaasmelk.
My taal is my asemhaal, my menswees, my uniform. My siel se verstaan, lewe vir my gees. Afrikaans is my taal.
Kiekies
Stories gebeur met my. Rondom my. Naby my. Al wat oor bly is om dit oor te vertel.
10 Kommentare
-
Viooltjie
Dis ons taal daai, Kiekies. Lekker geskryf ☺
-
Anze
Pragtig, baie dankie vir jou bydrae tot die Liefde vir Afrikaans projek
-
Kiekies
Dankie dat julle kom saampraat het, Elze, Neels en Viooltjie.
-
Ronel Janse van Vuuren
Mm, nou moet ek weer 'n bietjie na Karen gaan luister... Goed geskryf.
-
Kiekies
Baie dankie, Ronel
-
Koekekranka
Lekkerder as 'n krekker!
-
Kiekies
Bly dis lekker vir jou!
-
-
-
-
Arnold
...en daar's net een taal wat my hart verstaan en dis net Afrikaans.
-
Kiekies
Ja-nee ek sien jou hart verstaan al te goed!
-
Maak 'n opvolg-bydrae
Jy moet aangemeld wees om 'n kommentaar te plaas.
neels
Lynette sê net waar en wanneer dan draai ons en swaai ons in Afrikaans en laat die boerekonsertina huil