Ek ken ‘n taal
Ek’t gehoor daar’s ‘n taal wat van ver af kom
– onwetend – oor ‘n blou oseaan
om haar vlag te plant op ‘n suiderstrand
en toe wankelend in wording moes staan.
Ek’t het gehoor daar’s ‘n taal wat gewortel is
in die aarde, soos die stam van Kambro
wat dialek in Kaaps en Namakwa
en ook die karretjiesmens se Karoo.
Ek’t gehoor daar’s ‘n taal wat vry refrein
en wat name oor die landskap laat blom
in suikerbos, aalwyn, piempiempie, lint
viooltjies en vygies wat wink vir die son.
Ek’t gehoor daar’s ‘n taal wat luid weergalm
wat kan donder, wat kan blits, en kan hael
wat klank in ‘n fluit waar die wildwinde suis
druis in die branders wat oor seesande maal.
Ek’t gehoor daar’s ‘n taal wat ‘n hart het
dis groot genoeg vir nostalgies onthou
en selfs sou woorde uiteind’lik verbygaan
vind sy ‘n weg om van nuuts af te bou.
Ek’t gehoor daar’s ‘n taal wat uitbundig leef
wat lag, sing en dans, soms laat waai met ‘n riel
wat hartseer kan wals (wat soms huil oor dit als)
die taal het ‘n ritme, en haar ritme besiel.
Ek ken ‘n taal wat haar stemme wil deel
dis ons taal . . . en sy wil vlieg met haar droom
om altyd en immer aan dié suidpunt te bly
en om trots – in Afrikaans – hier te woon.
© C. Shaw
25 Augustus 2016
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
14 Kommentare
-
Palet
Mooi
-
neels
Ons trots ons Afrikaanse taal. Net jammer dat ons taal deesdae so vermoor word met n gemengery met Engels
-
Kiekies
Alweer 'n keer so goed bedink en verdig!
-
Viooltjie
Baie dankie Anze, Neels, Palet en Kiekies vir julle saamlees en kommentare. Ek waardeer dit baie
-
HelenaMellet
Sjoe Viooltjie. Dis puik gedoen! Jy het ons kleurvolle taal baie mooi vasgepen hier.
-
Viooltjie
Baie dankie, Helena Mellet. Ek waardeer jou lees en kommentaar sommer baie :-)
-
-
Ronel Janse van Vuuren
Mooi gepen :-)
-
Viooltjie
Baie dankie, Ronel :-)
-
-
Anze
Pragtig, dankie vir jou bydrae tot die Liefde vir Afrikaanse projek
-
Ina
Baie mooi! Ek hou daarvan.
-
Viooltjie
Baie dankie, Ina. Ek waardeer☺
-
Vonnie
Viooltjie, voorwaar is hierdie pragtige en kleurvolle gedig van jou mooier as mooi neergepen in ons Afrikaanse taal, ons trots! Ja, " 'n taal wat uitbundig leef wat lag, sing en dans. . ." En nou gaan sy inderdaad gesing word en dit by ons Gala-aand. . . Anze en baie dankie aan jou vir die geleendheid wat dit moontlik gaan maak om hierdie liedjie tydens jou uithaler Gala-Aand in die oopte te bring as moedertaal woorde met musiekvlerke. En mag dit toekomstig as liedjie sommer baie baie hoog vlieg!
-
-
-
Viooltjie
Baie dankie, Vonnie. Ek waardeer al die harde werk wat julle nou gaan doen om hervan 'n liedjie te maak. En baie dankie aan julle en Anze wat die geleenthied geskep het :-)
Maak 'n opvolg-bydrae
Jy moet aangemeld wees om 'n kommentaar te plaas.
Anze
Pragtig soos net jy kan