GEVANGENE
Die stadsgedruis se hammermeule
maal en kraak my siel tot as
en offer dit aan die vier winde se seerowerskepe
om dit in ballingskap net agter die kim
te gaan verpand vir niks
My siel smag
om aan hakkiestakkies in die Klein Karoo te hang
saam met stofwarrelwinde
langarm simfoniee uit te dans
saam met streepmuise boerpampoenputte
tussen die plooie van vasgeploegte lande te gaan soek
en net te rol in die kielievingers van die mos
by die oorloop van die dam daar op die plaas
My siel se opgaardam
lê vertrap tussen krake van teerpaaie
vergete tussen die stadsgedruis
en toegevou in beton kraalmure
begrawe onder flikkerende neonligte
… môre sal ek my goedjies pak
miskien gaan ruik
waar die kakiebos se parfuum fabriek in die vlaktes staan
miskien net agter die maan se skilfers aanloop
‘n kussing daarvan maak
en die nag groot asseblief gaan vra
om vir my ‘n sterrekombers te maak…
Louie
Gebore by die see, verlief geraak op die berge / platteland en woon nou in die Vrystaat saam met my vrou Charmaine en 11 maande dogter Katelyn. Was deel van WOES se eerste bundle uitgawe van 2008 onder my tweede naam Gerhard. Vroeg "afgetreë" en hou myself besig met my "kunswerke". Werk ook deeltyds aan my eerste digbundel. Alle hulp en raad sal goud werd wees ...Ag en dan die legal ding: alle regte word voorbehou op geplaaste werke
3 Kommentare
-
Evelyn van der Merwe
Jou beskrywings en woordgebruik is uitstaande.
-
Inkmoderator
Louie, ek gee ‘n mening oor hierdie gedig. Sien die voorgestelde veranderinge en gebruik dit gerus sou jy wou. Die stadsgedruis se hammermeule maal en kraak my siel tot as; [; gebruik om die lidwoord in l3 te verwyder] offer dit aan die vier winde se seerowerskepe [en verwyder] om dit in ballingskap net agter die kim te gaan verpand vir niks. [punt want volgende strofe begin met hoofletter] My siel smag om aan hakietakkies in die Klein Karoo te hang [hakie een ‘k’ en sonder ‘s’] saam met stofwarrelwinde langarm simfoniee uit te dans saam streepmuis en boerpampoenputte [met -uit; enkelvoud en ingevoeg] tussen die plooie van vasgeploegte lande te gaan soek en net te rol in die kielievingers van die mos by die oorloop van die dam, op die plaas. [daar -uit; komma en punt] My siel se opgaardam lê vertrap tussen krake in teerpaaie [van vervang met in] vergete tussen die stadsgedruis en toegevou in betonmure [kraalmure in die stad? – kraal -uit] begrawe onder flikkerende neonligte. [punt] Môre sal ek my goedjies pak [ellips nie funksioneel] miskien gaan ruik waar die kakiebos se parfuumin die vlaktes staan [fabriek uit; woordekonomie?] agter die maan se skilfers aanloop [woordekonomie] ‘n kussing daarvan maak en die nag asseblief gaan vra [groot -uit: woordekonomie] om vir my ‘n sterrekombers te maak. [Ellips nie funksioneel] Dit is ‘n besonderse gedig waarin die skrywer sorgsaam verkeer met die beelde en die leser doelbewus lei om dit amper sintuiglik te ervaar. Die ritme is belangrik in poësie en daarom stel ek voor (sien hierbo) dat sekere van die sinne funksioneel verkort kan word. Die gebruik van ‘n ellips laat by die leser ‘n oop gedagtegang, m.a.w. vir interpretasie ens. Indien die skrywer dit gebruik moet dit so bedoel word en eerder nie as die gedagte (soos in jou vers) genoegsaam afgesluit is nie. Ek hou baie van die gedig en sal graag jou terugvoer op die krit is. Groete
Maak 'n opvolg-bydrae
Jy moet aangemeld wees om 'n kommentaar te plaas.
Koekekranka
"n Pragtige versugting...