62 ZaniLa Rym

62 ZaniLa Rym

Die ZaniLa rym is ‘n interessante moderne versvorm met ‘n refrein. Hierdie versvorm was geskep deur Laura Lamarca en bestaan uit ten minste drie stansas van vier versreëls elk.

Die rymskema vir elke stansa is dieselfde as in Lang Maat (“Long Measure”):

ab(c1 c2)b / de(c2 c1)e / fg(c1 c2)g / hi(c2 c1)i …

In plaas van jambiese tetrameter het elke stansa ‘n lettergreep telling van 9, 7, (9) en 9 lettergrepe per versreël. Die derde versreël is ‘n refrein versreël wat binne rym bevat en word in elke alternatiewe stansa herhaal soos in die eerste stansa. Met ander woorde in die derde stansa die vyfde stansa ensovoorts. In elke gelyke stansa word dieselfde versreël herhaal, maar die interne rym word omgedraai. Met ander woorde in die tweede stansa, die vierde stansa ensovoorts. Daar is geen maksimum lengte aan hierdie versvorm nie.

“Sing Me A Song” deur Laura Lamarca is ‘n baie goeie voorbeeld van hierdie tipe versvorm. Maryse Achong se “Island Blues,” Divena Collins se “Awakening,” “Forsaken Love Returneth,” “Let It Happen,” “Memories,” “Sorcerers Cat,” “Spiritual Love,” “Titanic,” “Woodland in Spring,” Jem Farmer se “Gently Wakes,” “Sing Me a Lullaby” en Ryter Roethicle se “Green Beast,” “Lark Ascending,” “Penrith Parrots,” “Unwanted Love,” “Walk With Me” en “Your Spring” is almal goeie voorbeelde van die ZaniLa rym versvorm.

Hier is my pogings van die ZaniLa rym versvorm:

Vat my hand (ZaniLa rym)

a Vat my hand en ek sal die weg wys
b na ‘n beter plek as hier
(c1 c2) sê hoe lief jy is, dat jy my mis;
b salig is ons tot die daglumier.

d Laat ek my verloor in jou liefde
e as ons bestaan heel groots word,
(c2 c1) sê dat jy my mis, hoe lief jy is;
e daar is niks wat met die lewe skort.

f Dans romanties met my deur die nag
g in ‘n aardige soort saamwees,
(c1 c2) sê hoe lief jy is, dat jy my mis;
g in jou glimlag sal ek grasie lees.

h Elke dag as die lewe voortgaan
i is jy nog steeds in my hart,
(c2 c1) sê dat jy my mis, hoe lief jy is;
i nooit is ons weer van mekaar apart.

Daar is wit blomme in haar hare (ZaniLa rym)

Daar is wit blomme in haar hare,
blouwit sterre as sy lag
in haar oë, wat skitter soos reënboë,
‘n eie soort onskuldige prag

met die koms van lente in die lug
tussen die blomme wat bloei
in reënboë, wat skitter soos haar oë
vind sy waar die mooiste blomme groei

aan die skoonheid is sy gebonde
sien rose donker soos bloed
in haar oë, wat skitter soos reënboë,
maar in haar wange is daar ‘n gloed.

Verruk staan sy by mielie lande
sien wolke, donker en wit
in reënboë, wat skitter soos haar oë
is daar iewers waar ‘n goud pot sit.