Ek is leser, skrywer, gastehuiseienaar en boer. Mense is vir my baie interessant.  Tog staan ek baie dae verstom oor almal se doen en late, nietemin bly ek verskriklik lief vir ‘n mens.

Ek boer hoofsaaklik met kalfies.  Daardie weeskinders wat ‘n heenkome op ‘n ander plek moet kry. Niemand is trotser as ek, as hulle blinkoog en gelukkig saam met die ander plaasdiere stert omhoog speel en huppel nie.

My gastehuis staan rondom ‘n reuse stink witgatboom.  Daar word baie stories langs die bosveldvuur uitgeruil. Gehuil en gelag.

Ek het ‘n paar kwalifikasies agter my naam. Onder andere ‘n Meestersgraad in Volhoubare Landbou.

Noudat al drie my dogters klaar is met tuisonderrig, skryf ek.

Wat ‘n groot lekkerte!