Ek is 43 en woon en werk in die Paarl. My nering was destyds Skakelwese, maar daarna het ek vir 20 jaar in die buiteland gewoon en -werk, onder andere in Londen, Abu Dhabi en Namibië. Ek was in daardie tyd ook ‘n lugwaardin vir Etihad lugredery en het ‘n 5-jaar paspoort na die wêreld gehad. Ek werk die laaste 8 jaar as vryskut grimeerkunstenaar en haarstileerder, en het al baie bruide en matriekmeisies en gewone vroue en supermodelle ontmoet. Ek het met meeste van hierdie mense ‘n ongelooflike spesiale konneksie op een of ander manier ervaar.  Gedurende Covid kon ek nie my werk beoefen nie en het ingeskryf vir ‘n BA in Kreatiewe Skryfkuns by Unisa, wat ek verlede jaar voltooi het. Met onderskeiding, thank you very much.:-) Ek hardloop graag in die nabye arboretum en geniet tye saam met my dogter en seun die heel meeste. Ek hou van stories en mense wat karakter het. Ek hou ook van my lewe na aan die natuur en geniet my onafhanklikheid en stilte. Ek kyk graag na films met onderskrifte en besoek dikwels my dorp se biblioteek. Ek hou van mooi klere wat pas, ek is 1.84 m lank en dus is die perfekte snit van ‘n kledingstuk maar skaars. Daarbenewens het ek ‘n groot liefde vir vars, gesonde kos en elektroniese musiek en geniet dit om na goeie platejoggies te luister. Ek sal miskien nog wil woon in Kaapstad oor ‘n paar jaar en dan sal ek iewers langs die kus wil gaan bly waar ek elke dag kan gaan stap en swem en wyn drink en my verwonder aan my twee pragtige kinders en hulle lewens.