Kleurloos

Tussen blou en grys weet ek is jy
En my hart skree op sy hardste
Wag asseblief net daar vir my
Ek is oppad maar die pad is lank en ek is kaalvoet
Want jy weet mos ek hou van kaalvoet loop

Ek het jou ou rugsak op my rug
Vol sterre wat ek gevang het net vir jou
En jou gusteling liedtjie in my hemp se mou
Die son glimlag skerp vir my, jaag my aan en
fluister ek moet gou maak
Jy kan nie meer te lank vir my wag

Ek voel ek moet dalk eers ‘n bietjie rus
Jy sal mos verstaan
Soms raak die pad maar moeilik en swaar
En kan ek nie langer aangaan
Ek stuur solank vir jou n boodskap met die wind
Wag asseblief vir my net daar

Ek hoor in die nag se stilte jou stem sag
En ek wonder wat jy sê
Maar ek is moeg en moet nog so ‘n rukkie lê
Want my hart is ‘n deurmekaar palet
Met verf wat orals loop

Dieselfde son van gister
Voel ek op my wange brand
Ek moet opstaan en weer aangaan
Bliksem maar my pad is lank

Iewers tussen blou en grys
Dink ek ek het verdwaal
Want jy is dan nêrens hier nie
Het grys jou dan nou kom haal

Ek soek die grootste klip uit
En besluit ek gaan net hier sit
En ek wonder as ek net hier wag
Of jy my eendag sal kom haal

CM
22/11/21