Kom vat my hand

Kom vat my hand my kind
Laat ek jou vashou en bly nog so rukkie klein
In jou glimlag sien ek wit en blou skepe seil
En in jou oë skitter reëndruppels , vol beloftes

Ek wil die wêreld vir jou wys
Sonder die monsters en donderweer
Omdat ek weet dat jy bang is vir dit

Ek wil vir jou stories vertel
van mense wat nog goed is
en van ware geluk wat nog kan bestaan
Dat jy liefde ontdek, net soos wat jy jou
kerspersente oopskeur, vol opgewondenheid oor wat dit mag wees

Ek wil hê jy moet met jou diamant reëndruppel oë deur die lewe gaan, wat net die goed in alles sien, en breë sterk skouers
wat ander mense se laste minder maak, want so sal jou las ook minder wees

Ek wil hê jy moet kliphard sing saam met al jou gunsteling liedtjies,
en loop in die reën sodat dit al jou probleme kan afwas
Flieks kyk op Sondae aande, want dit hoort so
en lag vir dom grappe, sommer net omdat dit lekker is om te lag

Daar is so baie dinge wat ek vir jou wil hê
Maar vir nou wil ek net jou hand vat, en jou vashou, en jou nog net so rukkie langer klein hou

Want jy is my gunsteling mens, my selfgemaakte mengsel van sand en seë…. van kattekwaad en taai gemorsde vloere, van drukkies en sagte jammer mamma woorde…en ek is bitter lief vir jou

CM