‘n Oomblik

Het jy al ooit ‘n oomblik gehad
Wat jy nou aan terugdink en insluk
Soos ‘n blikbeker oggend koffie
En weet dit was dit gewees
Dit was jou oomblik van geluk

Een oomblik van totale vrede
‘n Gevoel dat jy enige iets kan doen
Enige iets kan aanpak
En kan uitsien na alles wat nog kom
En die wêreld skyn helder om jou

En vir daai oomblik was die prentjie duidelik
Maak jy sin uit die lewe se deurmekaarspul
Is dit nie meer ‘n gebreekte legkaart
En sien jy alles , soos wat dit moet wees
En hoor jy musiek in die stilte om jou

Ek kan nie meer die gevoel presies herleef
My hart is nou te veel ingekleur
Oorgekrap en uitgevee
Maar ek onthou dit so helder
En weet dit het defnitief gebeur

En soos ek terug verlang na daai oomblik
Hou ek dit saggies vas
In my koue hande maak ek dit warm
en draai dit in watte toe
Ek wil dit bêre vir ‘n volgende keer

Baie maal probeer ek ook die oomblik terug kry
Dalk met te veel whisky
Of miskien as ek lank genoeg vir die seë kyk
Vir die sonsak op die horison
Of in smeke na liefde oral om my

CM
29/11/2021