Trapsuutjie tyd #silwer

Trapsuutjie tyd

Tyd trapsuutjie
ritmies om en om,
soos skadu’s van die son
skuifel van oos na wes –
tyd laat hom nie keer
of beheer nie.

Tyd transformeer
gly van gloed na grys,
holderstebolder
in homosapiens se hand,
in grou of geluk gevou.

Tyd trippel-trap
in Afrika en Londen tyd –
pole van ‘n wentelwêreld,
uurglas in doen en late,
staan of spoed stilletjies voort.

Tyd bly tyd –
onwrikbaar en oud.
Ons meet hom met môres,
of mors hom met min,
maak hom vinnig
of trapsuutjie stadig,
soos skadu’s wat stap
van oos na wes.

Christa Diederiks ©

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag