Driekie Grobler

BRONS

Julie 2019 projek – ‘n Reis in Tyd

3.Verstilde eggo

êrens tussen gister en nou
het die streel van die klankharp
se eggo verflou
die vermanings dof en stil geword
met ‘n onmag
om denke (vredevol)
in woorde uit te stort

die roep van ‘n pou
se trillings verslap
tot slegs ‘n beduidenis
van vae onthou

daar waar onreg paar
het valsheid geknal
die suiwer van môre se wil
ontbeen
(voos gestroop)
in rou geskal

en al wat oorbly
is verdorde, vergete drome
van ‘wat eens was’
wat stelselmatig fragmenteer
tot stof en as.

Augustus 2020 – OOP projek

2.Formidabele vrou

Diep in die donker nag
met draai van uurglas
hingel my gedagtes
in huiwerende trag
oor grense en gebeure
wat deurskif uit geheue.

Moeders in hierdie tyd
wat verskeie skoene volstaan
met (on)sekerheid in raakvat-hande
wankellose tred
dapper ankerstaan
om in voorste linies te veg
vir selfbehoud en eie reg.

Waarheid lê verskuil in worsteloë –
waar pyn en seerkry stilte golf
magteloosheid wriemel
kommer kromtrek
in daaglikse worstelstryd
wat pêrelstoot in verborgenheid.

Hul omgee-strewe ongekend
hul siel met liefde oordek
klein klippies in ʼn groot dam
wat wyd (tot in oneindigheid) uitkring
ʼn wil vas en sterk
om daagliks te maak hul merk
al is hul tans ingeperk.

Hierdie ode aan elke
moeder, eggenoot, beroepsvrou
voorloopvrou, bymekaarhouvrou –
die wêreld sien slegs die sukses
is onbewus van nagtelike onrus
smeekgebede vir voorspoed en sielerus

in die wete oor wie en wat hul werklik is
wáár hul krag en hulp vandaan kom
dat môre se toekoms en sukses
geborge lê in snags se stilwees en wroeg
om bedags te kan regstaan en presteer
gereed vir elke uitdaging se swoeg.

Kwaliteit in menige vrou
wat daarna streef
om ʼn verskil te maak
nie net stilsit en wag
dat godswater oor godsakker vloei
maar self saai en arbei
vir voorspoed en groei.

Dankie aan elke formidabele vrou!

©Driekie Grobler

3.Seisoenaal

ek was jonk en vry
het in die lente
waaghalsig rinkink
kommerloos en dartelend
gesystap elke stormwind

om met volheid van somer
tot volwassenheid te groei
drome gejaag, potensiaal bereik
uit vrug saad geskiet
waarmee ek trots pryk

met taan van groei
is my hande deur herfs geboei
laag vir laag my menswees geskil
om naak, van inhibisies gestroop
my weerloosheid te onthul

en nou, in die winter
smag ek na rus en stilte se vrede
wetend dat saad geproduseer
seisoenaal hul eie siklus volg
terwyl ék – stelselmatig disintegreer

©Driekie Grobler

November 2020 – Samesyn-projek

3.Die kersboom van my hart

“Dolverlief,” het my ma gesê
toe ons saam onder die sterre lê …

die knusheid van ons samesyn
broei herinnering in my gemoed
van soel somersdae
se luilekker ontspan op die stoep

oor jare het ons vermeerder
‘n kroos van drie plus sewe
vrolike familiekuiers om die kerstafel
met kinderlag besprinkel ons lewe

vir niks sal ek dit ooit verruil
dié groot seën uit Vaderhart
wat stewig vasgestring hang
aan die kersboom van my hart

“Dolverlief,” het my ma gesê
waarheid het agter haar woorde gelê …

©Driekie Grobler

Januarie 2021 – Verwagting(s) projek

2.Geanker aan hoop

besiel my met hoop
teen doellose opstandigheid
oor soveel hedendaagse aversie

oorspoel my gemoed
met vredesverwagting
om kreatiewe denke
deurlopend te voed

beklad my wese met begrip
sodat geen objeksie
my ontspoor
of toelaat dat ek
oorleweningstryd verloor

begrens my denke
om geanker te bly
daagliks met vars verwagting
hierdie vloedgolf te ry

©Driekie Grobler (2021)

SILWERKLAS

Februarie 2021 – Liefdes projek

3.Liefdespraal

in die spektrum
van my gemoed
vloei verwagting
in neonprag
gul skakeer ek dit
in orde van balans
kwas dit met woorde
teen die hemeltrans
sodat my beminde
bespat sal word
met liefdespraal.

©Driekie Grobler (Feb 2021)

Eervolle vermelding:

Skakerings van liefde

jou wakkerword-glimlag
straal songeel deur my ontwaak
wat goue nektaarstrepe
heunigsoet boeket

my dag vlerke gee
om met arendsvlug
deur elke blou
te klief

later met skemergroet
my dors-verlange
met nartjiefleur-vrede
af te rond

wetend … dat jou teenwoordigheid
in liefdeskakering
my menswees met koloriet
bespat

©Driekie Grobler (2021)

Junie 2021 – Interteksualiteits projek

1.Taalstryd

Ag my waardig om saam
die gevegsfront te betree
luid standpunt in te neem
bewapen met helder denk
en vlymskerp benadering;
om onkruidakkers om te spit
met fyn ingestelde visier
weer ontvanklik te maak vir kwaliteit saad –
sodat ek in waagmoed
gedagtes sal ontkiem tot suiwer
spreektaal vir my nageslag.

Ag my waardig om saam
die stryd aan te voer met ‘pen en ink’.

©Driekie Grobler
(Intertekstualiteit) (Met erkenning aan die Ink Moderator se gedig “Plak my teen die linies” geplaas op Ink Skryf in Afrikaans se portaal)

Augustus 2021 – As die blare val projek

1.Met laaste groet …

was winter reeds in jou oë
bar en gestroop in afwagting
met slegs laaste herfsblare
as afskaduwing van wat vroeër was
bros en uitgedroog, geërodeer deur erosie
wanhopig gelym aan brokkies genade

hartseer het my blik hoopvol gespeur
na beduidenis van nog ‘n seisoen
of lente weer oor moeë takke sou bot
die geur van blom wéér saam met somer sal kom

maar vroeg op ‘n guur Saterdagoggend
het die tyding gekom
met val van die laaste blaar
het jy vertrek na doodsdal

in saad oor jare gesaai
lê voorbeeld wat voortleef en groei
want die waarde van jou lewe
dit waarna jy met soveel sorgsaamheid
lewenslank in liefde kon strewe
lê geborge in jou vrug se deug en krag

©Driekie Grobler

3.Kaalgestroop

vanaand pluk die wind
ongenadig aan my sielswand
stroop ‘n laaste brosblaar
uit my teer gemoed
bemantel tekens misgekyk
voor die laaste blaar se val
laat my kaalgestroop hink
voor ‘n nuwe seisoen wat wink

©Driekie Grobler

Oktober 2021 – Akrostiese projek

2.Somerglans

O, mooiste maand
Kom kelk oor aard’ jou fleur
Tros welriekende balsem
Oor laaste winterreste
Bot gul nuwe verwagting om
Eersug aan te wakker, en
Rugsteun somerglans met vreugde!

©Driekie Grobler

Maart 2022 – OOP projek

2.Breek oop die skanse

vasgevang deur inperkings
wat tralie om my denke
gebonde tot slegs gedeeltelike waarneming
met ‘n diep verlange wat stipoog tuur
om oop en vry te breek

holklinkend die ewige geroep
wat retories na antwoorde bly soek –
kwaliteit deelname beperk
deur ‘n tweestryd-lem
wat ontbondenheid striem

gebore om vry te leef en dink
maar ingehok om soos ‘n papegaai
agter mensgemaakte reëls aan te hink

gee my die sleutel
wat vryheid oop kan sluit
leer my die kuns om vlerk te span
en vry en hoog te sweef
sodat ek weer die volle waarde
van hierdie lewe kan beleef

©Driekie Grobler

Desember 2022 – Samesyn projek

2.My hart se tuiste

‘My huis is waar my hart is’
en my hart is by klein voetjies
wat dwarsgespoor oor my
oumalewe lê
sagte armdrukkies wat
meer as woorde sê
en liefdesogies wat
samesynvreugde kaats.

Wat meer wil ‘n ouma dan
vir Kersfees hê
as SO ‘n koester-tuiste?

©Driekie Grobler
(12/2022)

 

Januarie 2024 – OOP Projek

3.Lewensfilosofie

Tik … tok … tik … tok …

draai die aarde om sy wentelbaan; non-stop

die een jaar vloei in die ander

brander na brander

terwyl ons leef en streef

roof en kloof

besin en beding

onbewus van waar die einde is

of waar die ware begin

 

©Driekie Grobler (2023)

 

 

(9)