Elizabeth Martie Bezuidenhout

Lees meer oor Elizabeth Martie Bezuidenhout

BRONSKLAS

Augustus 2021 – As die blare val projek

3.Blaarverlorenes

‘n blaar
het
ge-
val

soos Boerneef
se bergansveer
by Woeperdal

maar ek

ek’t die blaar
op-
ge-
tel

tussenin

ons klaar
geleesde blaaie
hartsdieprooi
g
e
p
a
r
s
waar dit
plek-plek
bloedbevlek
met vuurtong brandkeel
letters vlamrooi stemverdroog

ek wou jou daar
wegsteek, vergeet

maar

‘n traan het
g
e
v
a
l

soos Boerneef se bergansveer
by Woeperdal

bly ons vir mekaar
v
a
l

Elizabeth Bezuidenhout

Maart 2022 – OOP projek

2.Haar lentedroom

al,
sou strale son skreef-skerf,
okersag wintervaal
aloor haar,
bleekblou blinddoekoë
val,
vlerksprei gistergroen onthou …

o o p

nes,
stofpartikels tussendeur
hortjiesruite ligspoor
loom-sweef,
dwaalgees sy …
steeds

v r y

al,
het haar vlindervlerke
in ooglid broosoud
winterkou toegevou,
kleurspiraal blommespel
knip-
oogfladder, lentedroom
aloor haar eens …
helderblou kinderoë
en
bot-bot
botsels bloot
o, so

o o p   o o p
o
p

Elizabeth

April 2022 – En toe… projek

2.Na liefdes(v)uur

En toe …
veras jou vuurgloed
donsveerverwaai, duskant westerkim
draal-dwaal jy skrams, deur jou laaste ligspoorglim

skemerbroos in jou donkerverloor, nabetrag
troosvind jy my vuurvliegievlerke, roosblaarsag
soos my koesterhart vlerkomvou,
nestel my ligholtes jou

want mý vuurtjie bly brand, my hart gee sy lig
hier binne bly jy veilig, so warm vredig

Elizabeth Martie Bezuidenhout

Met apologie aan H.A Fagan

Mei 2022 – OOP Projek

1.Ek was …

ek was
egmooi
vol-lyf-vrou
saam met jou

maar

nou
is ek
net
vol-lyf-leeg
sonder
jou

Elizabeth Martie Bezuidenhout

3.Sonder

somber somer
somber son
warm skraal
sonder straal

somber winter
somber kind
sonder ys
sonder wind

somber vind
lentekind
somber groei
weggesnoei

somber herfs
somber kleur
roesjas
middeldeur

somber stil
son(on)der jou

Elizabeth Martie Bezuidenhout

SILWERKLAS

Junie 2022 – Winterlandskap projek

1.Hartklopdisselboom

ek wil nie weer
in die ryptrap
van ‘n winterlandskap
jou hartklop verloor,
ophou hoor
nie
néé
hierdie keer
gaan ek deur jou
lente-are bloei,
somervrug versoet,
já,
selfs in herfsblaar,
dieprooiwarm koolgloei,
en sou …
winter bibberspoor
ongenooid kom,
sál ‘k koesterwarm
onder jou vaal basjas
wegkruip

want só
in die ryptrap
van ‘n winterlandskap
sal ek jou hartklop
nimmer weer verloor

Elizabeth Martie Bezuidenhout

2.Wees van my wees

wees,
my vlees
vlamkers waskombers
om my naakkoud toegevou,
my kaggelvuur
waardeur hartklopdans se knetterbrand
wintergees buite hou,
my rooiwyn
in warm-aar verleiding
tot my dor(s)weesglas vol vloei,
in verlangekyk kindverstout
hartspoor na buite
in die ryptrap
van ‘n winterlandskap
ons beskore

ek vra jou

bloot

wees …

Elizabeth Martie Bezuidenhout

Augustus 2022 – My huis is my woning projek

2.as die kerkklokke lui

wanneer winter vroeë môre sluimer-sloer,
songesig skuifel-skuifel,
knipoog-loer
rafelhang ‘n asgrys wolkjas
kort voor lank
waar onewe horlosiebene drentel,
skuins na ag
ewe hinke-pinke, skamerig
alom die skilferende plooigesiglyne
waaragter kerkklokke nou luidkeels
dog hoogheilig langsaam huil
dreunerig snikkend in klingel-klang
herroep dan ‘n era van jare lank,
draai honderde sonsopkomste terug

en my kaalvoetkind toringklim na songesig dae in skitteroë
toe ek nog klokhelder kon,
kon onthou sing en hoor

maar nou bly …

net ‘n vibrasie van,
‘n prewelpraat begeerte opgewen
soos tortelduifgesang

maar as die kerkklokke so lui
in my Vader se aardse huis – my tydelike woning
dan weet ek …
my tyd,
gaan kort voor lank
in engele lofliedere wolkbreek,
sodra my laaste winterasem wegwaai
sal ‘k by Sy hemelse huis
óók my ewige woning
bloeiselbot

Elizabeth Bezuidenhout

 

 

 

 

(3)