Retha van Deventer – Piketti
Lees meer oor Retha van Deventer (Piketti)
BRONSKLAS
JUNIE 2024 – ONBEKENDE projek
1.Hersinskim
tastend in die verlate gange
van gistergedagtes
gekarteer in seer
van verlies
verwerping
en selfveragting
soekend na sekuriteitskoördinate
word hande uitgestrek na bo
smagtend uitgereik
na ‘n ongekende môre
‘n euforie-dag
waar die son helder filter deur geloof
en hoop ‘n oop hart kalibreer
tot vrede en liefde lêplek vind
in die hersenskim
van toekomsdrome
© Retha van Deventer, 2024. – Piketti
JULIE 2024 – OOP PROJEK
2Hartsverlange
my hartsverlang’ hang hunk’rend aan die maan
tussen legio sterre flonkerend
wie sal my tog hoor … wie sal dit verstaan
waar pyn kristalliseer in enkel’ traan
gedy gister-gedagtes folterend
my hartsverlang’ hang hunk’rend aan die maan
liefde wentel in wye wentelbaan
ewig buite bereik dog skitterend
wie sal my tog hoor … wie sal dit verstaan
in die na-nag van slierte grootheidswaan
ontwyk tastende troos verpletterend
my hartsverlang’ hang hunk’rend aan die maan
as alleen floreer in solo bestaan
nie meer genoeg is, maar kil kenterend
wie sal my tog hoor … wie sal dit verstaan
gun mý ook die hartstog wat nooit sal taan
gun mý ook die koest’ring betowerend
my hartsverlang’ hang hunk’rend aan die maan
wie sal my tog hoor … wie sal dit verstaan
Piketti – Retha van Deventer
3.Somer in jou winter
somer in jou winter
ek wil die eerste sonstrale wees
in die klowe van jou seer siel
my teen jou winter aanvly
tot my hitte versprei
diep in jou oë
en vertroue
koesterend
lêplek
vind
weg
dwarrel
rolbosse
van haat en nyd
wat teen die hange
van ’n hart kaalvoet dans
kastyding heftig haper
in gister se witter as sneeu
waar winter wankel voor my glimlag
Kopiereg: Retha van Deventer, Julie 2024.
AUGUSTEUS 2024 – SKULDLAS PROJEK
2.die hel in my
in die holte van gamkaskloof
waar waterstrome ongeknel vertel
van sorgelose rotsformasies
wat sorgvuldig opgestapel oorhel
en dagsome drome knus omvou
verlate
ongeskonde
wissel fauna en flora gemeenplasies
oor die skuldlas in my aan hul toevertrou
en agtergelaat soos eggo’s teen loodregte kranse
om weer my ekwilibrium te vind
in ‘n hemel midde die hel
©Retha van Deventer, Augustus 2024.
November 2024 – OOP projek
1.die gladde stiltes in glas
waar blinkblou ster-oë in spieëls talm
hoor’k my siel se skril frekwensie
krete wat weerloos in die kosmos weergalm
stilstom blik verstrik
troosteloos in tyd
met uitgestrekte hande
soekend’ siel
tastend in refleksie
versplinter verlange in retrospeksie
gevangene van gister
wat na môre tru-kyk
glinster geloof vasgevang
in die draai van die ander wang
waar hoop tussen lood en glas aan’t skerwe spat
en sekondes verposend draal…
soos na-nag-ure
in volmaakte maansirkels stil kring
tussen toe
en
nou
Geïnspireer deur en met intertekstitel van: die gladde stiltes in glas deur Louis Esterhuizen
©Retha van Deventer, November 2024.
SILWER KLAS
Desember 2024 – Kersfees projek
1.sensoriese euforie
wanneer Kersfeesklokke beier
en tinsel oogverblindend blink
strek liefde en hoop veel wyer
Sy geboortedag word herdink
Retha van Deventer
Februarie 2025 – Water projek
3.Oranje Poseidon-soene
ek proe jou kabbelklank in die missproei
smagtend, tastend aan rotswande
jou droogteweersin eggo in die wind se geloei
minagtend stu jy genadeloos voort na benede
donderend druis jou hidro-stem
eggo jy wit in borrellende skuimgolwe
jou tuimelsluier onbeklem’
oor oer-ou ruwwe rotskranse
wat erosie-natgetuig … seepglad
van jou stromende instinktiewe soeke
slingerend, meesleurend jou waterpad
waar jy op ‘n maanblank strand aandoen
roep ek jou ewig vaarwel
wyl jý Poseidon’s voete soen
© Retha van Deventer, Februarie 2025
Voetnota:
Neologisme: tuimelsluier – waterval
Poseidon: god van die see uit die Griekse mitologie.
MEI 2025 – OOP PROJEK
1.slenter-smagting
ek wil weer sorgeloos saam met jou slenter
op bokspoorpaadjies en deur wildevaringruigtes
langs kabbelende strome en bruisende branders
die gejaag na ’n grou bestaan agterlaat
totdat geboue en beton wegsypel
soos reën in die dorstige kalahari-sand
sodat ek deur die nimmereindigende newels
van voortslepende hede-roetine
’n nuwe môre kan sien
’n kristalhelder kaleidoskoopdag
waar dit net weer ek en jy is
…op bokspoorpaadjies
in wildevaringruigtes
langs kabbelende strome
en bruisende branders
Retha van Deventer
JUNIE 2025 – PIEKNIEK PROJEK
1.Solo-uitstappie
ek hunker daarna om
heuningsoet herinneringe oop te sprei
(soos ’n blommetjiesdeken of blokkieskombers)
en ‘n mandjie vol somer-onthou uit te pak
bietjie-bietjie te peusel
aan keurige koestergedagtes
en godgegewe gisters…
dit soos warm sonstrale
deur my te voel versprei
terwyl vandag ’n steeltjieglas vol
nostalgie skink
en ek dit argeloos
met lewensblyheid indrink
kommervry
© Retha van Deventer, Junie 2025.
2.Roostuin-rendezvous
allerfraai kom hul vrolik aangefladder
van alle kante
sysag
grasieus
in hemelse kleurpalet getooi
wit
geel
oranje
selfs gespikkel met rooi
wikkel hul lyfies
om vir ’n stonde
onomwonde
deel te wees
van die roostuinpiekniek
’n ware vlindernektarfees
© Retha van Deventer, Junie 2025.
JULIE 2025 – SKADUWEE VAN TYD PROJEK
1.tanende tempo van tyd
wanneer die tempo van tyd afneem
by die stilstaan van jou fotoraam
herinneringe tydloos talm
en ‘n glimlag luiweg sy plek kleim
in die koördinate van vergange jare…
verlustig ek my in ons
wanneer die tempo van tyd afneem
fluister ek steeds jou naam
kwyn verlange en verdwyn smart
want ons liefde is soewerein
selfs oor hemelse grense…
verbly ek my in ons
wanneer die tempo van tyd afneem
is ons weer onwrikbaar saam…
© Retha van Deventer, Julie 2025.
2.Uurglasdrome
‘n blink toekoms wink met sonstraalglans
die voordag bekoorlik nader
chronos gedy voorspoedig
minsame sekondes
tik-tok aanloklik
vervul wense
propvol lag
vreugde
soet
sout
hartseer
dolleeg hart
dog oorvol smart
wanneer trane stroom
en dreig om te verswelg
luier kairos doelloos leeg
in die nanag van eensaamheid
spat uurglasdrome kru aan s
k
e
r
w
e
© Retha van Deventer, Julie 2025.
SEPTEMBER 2025 – ORDE NA CHAOS PROJEK
1.Simfonie
die kakofonie van klank skryn
soos krassende kraaie
dissonant
steen des aanstoots
stem elkeen blatant in
solo
‘n instrument
met wedywerende toonhoogte
en tiradiese tempo
kerm crescendo’s selfsugtig
falsetto in stryd teen tyd
wanneer maestro sy stokkie lig
daal doodse stilte sereen neer
frappant swiep die maat begerig
vanaf sy slanke gewrig, kalmerend
in absolute beheer, hipnotiserend
gehoor hou hul asems op … afwagtend
met eens seën legato note … meevoerend
soos hemelse kore betowerend begin ‘n simfonie in sekure harmonie
© Retha van Deventer, 29 September 2025.
3.woordmag
jou swetsende woorde
laat my swymelend vlamrooi
wanneer jy skeltaal kwetsend
teen my werp
soos skrapnel
in hellevlug
draai ek my rug wanhopig krom
as verydelde skans
met my lippe loom na joune gerig
straal my bloesende gesig begerig
minsaam en soet klink jou liefdeswoorde
soos suiwer nektar vir my sinne
salwend soos seldsame olies en mirre
vir my hunkerende hart hier diep binne
woorde gespreek… lei tot liefde of leed
© Retha van Deventer, 29 September 2025.
OKTOBER 2025 – OOP PROJEK
1.ek mis myself
wanneer die volmaan boggelrug oor die berge loer
en ek geheime gesprekke met ver winkende sterre voer
kom lê daar ‘n hunkering na ongekarteerde koőrdinate in my hart
wanneer ragfyn grassade in die wind warrel
smag ek na die ongebondenheid daarvan
vry van voorskrifte
vry van voorgee
een met die natuur se weë
waar rang en herkoms
geen verskil maak nie
wanneer skulpgruis onbeskaamd
hul pêrelflikkers vir die son gooi
terwyl branders poog om hul in skuim te verswelg
verlang ek daarna
om ook my ware kleure te wys
en net weer
myself te wees
© Retha van Deventer, 31 Oktober 2025.
2.karookind sal ek bly
tussen aand- en waterblommetjies
koringlande en angorabokke
lê my voetspore
en eggo my lag
gekoester deur die Outeniqua en Swartberg
vertroetel in Hottomskloof
geloof geanker in die klinkklare tablo
Van noem-noem, klapperbos en kambro
wat onwrikbaar swyend getuig
van opregtheid
en deursettingsvermoë
vir ewig gewortel
in die Klein Karoo
© Retha van Deventer, 31 Oktober 2025.
FEBRUARIE 2026 – OOP PROJEK
3.woorde is oorbodig
die vredige stilte tussen ons spreek meer as ‘n duisend woorde
waar ons onbevange flankeer met melankoliese maanligstrale
en sterre sito-sito hul verganklikheid sein in flonkerende morsekode
jou nabyheid is ‘n kosmiese orgasme
Retha van Deventer
MAART 2026 – HEFS/KAS PROJEK
1.maak my oop
o gooi my deure wyd oop
sodat lig my kan binnedring
en ‘n skouspel kleure oopkring
die duisternis in my tydelik verdring
o gooi my deure wyd oop
sodat ek jou fladderende vingers kan gade slaan
wanneer hul liefderyk oor dit wat ek jou kan bied stryk
wyl jy knus hier teen my staan
o gooi my deure wyd oop
sodat jou genoegdoening ook my bereik
wanneer jy in mý jou keuse vind
en onbeskaamd daarmee pryk
o gooi my deure wyd oop
laat eensaamheid vir ‘n wyle wyk
Retha van Deventer
2.grabbelaar
jy los my in ‘n warboel
wanneer jy lukraak
van rak tot rak
tas en torring
en onbeheersd rondvroetel
troetel jy jou soeke
na iets gepas
of
skalks
flambojant
en astrant
wat perfek pas
(by jou)
tiener-parmant
jy los my in ‘n warboel
Retha van Deventer
(14)
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...