Corrie Kersboom

Corrie Kersfeesboom

Van doer onder het sy haar lewe aanmekaar gesit.

Leë bottels verkoop om ‘n deur vir haar toekoms te bou.

Sy het vir die hele dorp gekook, al was haar eie kaste ook dikwels leeg.

Ystervrou het sy haar lewe bestuur vanuit haar kombuis se troon.

Sou jy foute maak, was haar woorde:

“My kind, dra jou kroon.”

Aan haar takke was daar altyd nog plek vir iemand om te hang.

Vir omgee was sy nooit bang. Swart of wit, almal was haar kind.

Vir jou foute was sy altyd blind.

Die dorp se geheime het sy bewaar. Daaroor was die skindertonge maar naar.

Net voor sy ons vir oulaas groet, maak ons haar grootste wens waar.

“My kind, voor ek eendag die emmer moet skop, wil ek net nog een keer hier op my tafels dans.”

© Ryno du Plessis, 2026