Latest Activity:

Barbara Smit
om

Barbara Smit

Lees meer oor Barbara Smit

Brons klas

Mei 2018 – Moeders projek

1.Mamma

Mamma, jy wat

taal op my tong geplaas het
kleure in my oë geverf het
‘n storie in my ore geplant het
‘n dansie in my spore gesaai het
blomme in my trane rangskik het
‘n gebed in my stem gevleg het

Mamma…

dis jou siel wat onder my vlerke in geblaas is
jou stem waarmee my hart gevoering is
jou wysheid wat my kniee sterk maak
jou woorde wat my bloed rooi maak

© – Barbara Smit 11/05/2018

Maart 2019 projek

1.Agterpraters

Eenmaal ongevlek vlam jou verhaal
nou fletsend donkerswart geletsel
kerf geeljaskind se bek jou kaal
jou weggooihart versmoor in braaksel.
Steeds draai ons aarde om en om
en jy draai maar swygend saam
die agterpraters – nou kamstig stom
En ek? Ag Here – ek’t dan ook met die tong geslaan!

© Barbara Smit 22/03/2019

  • Neologismes – geeljaskind, weggooihart, agterpraters
    • Interteks – Eenmaal: CM van der Heever

Eenmaal

Ook eenmaak in die kringloop van die tye
sal hierdie aardbol uitgebrand en dood
in eindelose leegte hang en afstand-swye
sal nog sy uitgeworpenheid vergroot.
En al die mensgeslagte sal vergete
en weggebrand wees net soos gras;
Maar, God, die swaarste – hoe klein! – is nog die wete
dat ek ook deel van die verwoesting was!

Barbara

Februarie 2019 projek

3.Verby

vasgevang
is jy tussen dit
wat jou hart begeer en
werklik is en ingehok is jy
jou liefde soos tralies wat
voluit leef se vlerke knip
verniet wag jy vir haar
om tog net om te kyk
en terug te draai
maar so
saggies
net soos
die sandjies
wat in ‘n uurglas
val – so saggies neem
elke treë haar net al verder
verder en verder weg van jou
tot haar voetstap dof raak en
later heeltemal verdwyn tot
jy alleen agter die tralies
van jou liefdestronk
moet bly

© Barbara Smit –10/02/2019

Mei 2019 projek

2.Bruin kardoes

vir jou ‘n bruin kardoes
‘n hele mengelmoes
deermekaar swiets
nikkerbols en likerish
miskien dalk ‘n kondensmelkpikkie
als bymekaar gebind met ‘n strikkie
al die dinge wat ons moes
en al die dinge wat ons wou
als pak ek in daai kardoes vir jou
al die lag en lekker
van doerie tyd tot nou
gebêre onder baie jare
begrawe onder baie stof
om uit te strooi saam’t bont hersblare
vóór ons gedagtes heeltemal verdof

© Barbara Smit

SILWERKLAS

Junie 2019 Projek

3.Die oubaas

as die Oubaas
kromrug nader skuifel
die son net so effens
so deur die ylgrys hare
so op sy bleskop blink
hoor ek hom grom en kreun
sien hom norsig op sy kierie leun
my asem, die koue wasem
wat deur sy neusvleuels wolk
dis soos ‘n somber misfloers om my
en ek voel
sy kille oë my siel in priem

die Oubaas is moedwillig
ja, hy mors met my gemoed

© Barbara Smit

November 2019 – Laat lente projek

1.Amper Somer

dis amper somer in jou lewe
so skielik word jy groot
eens sou jy op ‘n droom kon swewe
maar manword druk jou menswees dood

die wye wêreld is jou speelplek
jy weet so als van als
as donkerte jou enkels lek
staan jy so fors en vreesloos stil

ek, hier eenkant swyg maar eerder
‘n stil gebed tot Hom
want jy vlieg elke dag al verder
ek sukkel om jou op te som

ek bid dat jy bekleed met wysheid
jou stap sal stap op aarde
dat jy lewe tussen dood sal soek
sal sien nie als wat blink het waarde

© Barbara Smit

September 2020 – Liefdesprojek

2.LIEFDE

waar liefde ontbreek
het ek gebreek
het mond gesê maar hart óntsê
het hande gehou maar hart ónthou
het lyf onthou met ‘n hart ontrou

het U dan nie die brood gebreek?
smeek ek dat U dié hart óntbreek
dat U my sê, óntsê
my rou, óntrou
dat Heer U my ontrou
vir ewig ón-ontrou

as U wat LIEFDE is
my beker vul en my vervul
my styf vashou
my laat onthou
van als wat was en als wat sou

wie sal dan Heer
die liefde weg kan keer?

© Barbara Smit

3.En passant

in eeue-oue wentelbaan
sleep dof die asem van die maan
waar een by hitte van ‘n vuurtjie hurk
luier liefde in die pad se vurk

in die verbygaan oë wat groet
met minnewoorde swygend soet
maar voordat hande vas kon gryp
het son by maan verbygedryf

ongesê, in as gelê
statig-stil die kans verspil

© Barbara Smit

Oktober 2020 – OOP Projek

1.Sou jy bly?

as jy
my binnekamer
sou betree
my sonder
vreugdesmasker
sou ervaar
sou jy
in die skaam-skemer
van my liefde
wou vertoef?

sou jy
verstrengel raak
in die rafels van my tong
my vrese en onsekerheid
jou wurg
sou jou hande teer
steeds só sag
oor my wang kon streel?

sou
rustelose storms
in my opruk
die hemele verswart
dit kook en borrel in my hart
sou jy steeds
wou bly by my?

© Barbara Smit

Desember 2020 – OOP -projek

3.Doring

doring
gladdelyf gesant
gekoester al vir jare
dig teen my bors
wieg sagkens weg
en word gewek
uit nanag-euforie
geruk deur reuk
van vars formeersel

hoe lank nog voor jy
die laaste lewe uit my suig
.
© Barbara Smit




Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed
  • PJB het n geregistreerde lid geword

  • Ian wrote a new post

  • Amaspoke wrote a new post