Colin Steyn

Lees meer oor Colin Steyn

Bronsklas

November 2020 – Samesyn-projek

2.Kersligkuier

Die ootmoed van die middeljaaruur
spog nie meer om die braaivleisvuur
Voorspelbare klagtes oor die politiek
los ons vir die benoude kliek
Maar sug tog as die Bokke brou
Waar is ons Danie Gerber nou ?

Ons koester nog die romantiek
die wonderwêreld van musiek
die voorreg om nog te kan werk
die relevansie van die kerk

Die kring vernou met skemerlig
Tonge raak swaar van hartsgewig
Donker vergeet van als oorbodig
Die siel moet bieg : ek het jou nodig
Kerslig kom smelt ons kors soos was
Saamwees maak harte los en vas

Colin Steyn

Julie 2023 – OOP projek

2.ek wéét

ek weet van die noorderligte
wat die mensrede oorrompel
en groot watervalwonders
wat die siel tot stilte dompel

dat verstommende prestasies
die mensheid so bekoor
ons meevoer in euforie
waarin ons onsself verloor

ek weet daar’s reuse rykdomme
onmeetbaar op ‘n skaal
en ‘n oormaat geil genietinge
waarin die aardmens kan verdwaal

maar ek wéét dat ál die gawes
aan hierdie mensehart gegee
smelt in jou louterwarm liefde
soos n emmer in die see

 

Colin Steyn

 

September 2023 – OOP projek

2.aanlyn-pofeet

Jy weet meer as Wikipedia
die aap is uit die mou
op sosiale media
plant jy die beter hou

Jou intro weet al lankal
– wat die meeste nie verstaan . . . –
dan vloei jou dieper insig
soos water uit ‘n kraan

Dit waarmee bleek sterflinge stoei
het jy lankal uitgeklaar
die antwoorde wat in jou broei
is ‘n edele gebaar

maar die plig tot raad oorskrei jou baan
al word dit nie gevra nie
en word dit in die wind geslaan
kan jy dit nie verstaan nie

tot die krap-krap van jou credo
jou relevansie erodeer
en die radar van jou volgers
jou seine ignoreer

-cs-sept-2023- Colin Steyn

 

Januarie 2024 – OOP Projek

1.Lobgevegte tussen verse

Ek staal my by die lees van woorde
wat oor my spoel uit alle oorde
tussen taalsuiwerheid wat drup
en dié met ‘n stappel in sy hup

My regterlob, hoogs onontwikkeld
is op sy beste maar versukkeld
My linkerlob, versot op rede
snak na die sin in Griekse snede

Ek spartel tussen skommel-frases
verloor die goue draad deur fases
Ek voel my dom waar ander swymel
terwyl ek dronk deur woorde tuimel

Maar praat dit vêr-links Afrikaans
voel dit weer soos ‘n kopstamp-dans
begin sy skoon-banale streling
die aftelling na my verveling

Ek skud my kop oor my gebrek
aan artistieke intellek
Ek wroeg te veel waar ek dit mis
want woorde kerf sy eie nis

So ploeg ek maar die middelgrond
en saai my woorde nie te bont
My lobbe doen hul hele bes
om dit weerskante te bemes

Ek skryf nie vir die resensente
waardering van die plebs, my rente
en met respek, Meders en Perse
Ek is mos ek, en so my verse

 

Colin Steyn

 

2.Onpeilbare wisselwerking

Dink ons ooit daaraan

dat die dieptes van harmonie
en louter liefde uit die wese van God
die grondslag van die skepping was?

En besef ons net so helder
dat Hy die broos komplekse mens
as Sy vennoot gekies het
om dit alles te koester?

Weeg ons die waarheid wel genoeg
dat sonder die vryheid om te kies
ons nooit die beelddraer van die vrye opperwese sou kon wees nie?

Want dan was die lewe net een uitgerekte kleedrepetisie
van robotte
sonder outentieke intensie
sonder teleurstelling
sonder verrassing
sonder hart

So lê ons lewenswerklikheid
tussen die goue bedoelinge
van die eindeloos troue God
en
die chroniese gevolge van ons feilbare strewes en keuses

Die vreemd-bekende wisselwerking
die ontsagwekkende misterie
van die dae van ons lewens

 

Colin Steyn

 

SILWERKLAS

Februarie 2024 – Dolos projek

2.Retoriek

as ek blinkoog waag waar ander faal
en dit word helaas ook my verhaal
as my dapper drome my beskaam
en ek druipstert terugkruip in my raam
as ek sukkel om die blaam te vind
in grootmenswaan dog ewig kind
as ek die tuimeltrein leer ken
wat net soveel verloor as wen
is dit bloot die voorsienigheid
wat my kom toets in lag en stryd
of het die dolosse geval
tussen heuningbier en nastergal?

Colin Steyn

 

MAART 2024 – OOP PROJEK

1.Uitgepars

die môrester begroet hul daar
die kort nag lank vergete
mens en masjien werk onverpoosd
deur skroeiwarm dae, verbete

die kulminasie tot die vrug
op die roep van die natuur
na die lang verwagte oestyd
in die songedrenkte uur

tot die swanger vragte eindelik taan
en die son skuif uit sy somerbaan

en die wynstok gee gelate oor
wat ander wen, het hy verloor

dis asof dit die teken is
tot herfsverval en koue rus

as die haas ontbinde parstyd-reste
saam profeteer oor die oesjaar-beste

 

Colin Steyn

 

3.Poort na gister

geen dekor is nodig
om die toneel op te kikker nie
die ouwêreldse eenvoud is genoeg
net die plaashek
en die uitgetrapte tweespoorpad

my poort na gister
waar ek deur kon sien
maar nie kon beheer nie
onopgesmuk
maar nie moeiteloos nie

o die louter nostalgie
van ‘n vreemd-bekende werklikheid
van dit wat was
en dalk
kon gewees het

iewers in ‘n sagte doek toegevou
met ‘n tikkie hartseer
en ‘n tikkie vrede

dis net
die seeroog
is die slot

 

Colin Steyn

 

APRIL 2024 – UIT DIE OOG VAN ‘N KIND PROJEK

3.Kindertroos

Meer as ‘n godsdienstige dissipline
of ‘n geestelikheidjie op my kerfstok
of ‘n strawwe skoot breingimnastiek
wat sê ek’s wel al voel ek siek

kom die refrein – moet julle nie kwel nie

nie net as ‘n opdrag uit die hoogte
terwyl ek spartel in my nood
nie net gelaai met groot gesag
deur een wat sê Hy het alle mag

maar ‘n gestroopte troosbelewenis

want die anker van die wyse raad
lê in die Vaderhart-motief
wat kinders
deur kommer gekasty
met omgeesalf van angs bevry

 

Colin Steyn

Mei 2024 – OOP projek

1.Dit is so

Die listigheid vra selfvoldaan
en saai die eerste twyfelsaad
Is dit dan so dat God gesê het
vermy die kennis van die kwaad?

Eva se antwoord lok repliek
wat sê – nee God is net bevrees
dat jul deur hierdie wonderkennis
aan Hom gelyk sal wees –

en deur die eeue hang die vrae
in ons immer twyfelaarsgemoed
is Hy die groot almagtige ?
is Sy bedoelinge altyd goed?

toe kom die antwoord eeue later
in die Hebreërs se boek
Hy is die enigste EK IS
en Hy beloon dié wat Hom soek

 

Colin Steyn

 

Februarie – Water projek

2.Waterskeiding

Toe die aarde nog woes was, toe was jy al daar
Jy’t gebreek toe die eerste moeder moes baar
By die sondvloed laat jou strafbevel
net agt in die lewe om dit oor te vertel

Die skelfsee oorspoel die Egiptiese mag
en die slawevolk loop vry ná vier eeue se wag
Moses slaan die rots toe hul moed begin kwyn
en jou strome van lewe vloei in die woestyn

Toe hulle na jare weer deur jou moes gaan
begrawe jy hul slawesmaad in die Jordaan
Die swerwersgeslag, deur vernedering verwelk
blom weer in die land van heuning en melk

Die Godmens verrys uit dieselfde rivierwater
met ‘n stem uit die hemel, meer as twaalf eeue later
Deurdrenk staan Hy daar, in die mensheid gedompel
tot redding vir dié deur Sy strome oorrompel

©-cs-feb-25 Colin Steyn

 

Maart 2025 – OOP projek

1.Die strik van sien

Ons staar verwonderd na ‘n skildery, ontroer deur die estetiese van die kunste

Ons raak nostalgies in die herlewing
van haas vergete juweeltjies uit vervloë dae

Ons waardeer oomblikke van vrede,
die rare belewenis van ‘n versadigde gemoed,
‘n stukkie hemel op aarde

Ons koester die liefde,
die mees beskrewe maar steeds gebrekkig
uitgebeelde spesiale band,
wat tog net in die binnemens beleef kan word

Ons beleef die bewussyn van die verhewe binne-dinge, onderskei van die bloot sintuiglike

Is dit nie wat van ons mense maak,
weinig minder as goddelike wesens,
ons verhef bo die oënskynlike nie?

Is dit nie die wentelpunt
waar die aandrang op ‘n sienlike godheid,
wat ons met ‘n skalpel onder ‘n mikroskoop
sou kon dissekteer en beoordeel,
so volslae uit sy diepte bevind word nie?

©️-cs-mrt-25 Colin Steyn

 

 

 

 

(7)