waar my kinderdae woon (goud)

waar my kinderdae woon

tussen hout en hangers vind ek dit elke keer:
die reuk van seep en sonlig en Red Door
wat my wêreld terugskuif na kniehoogte
toe ek slaapdronk my pad tot by haar kon vind
vir opkrul teen die veilige hitte van haar lyf

my vingers volg die nate
tot by dae op die strand
waar sy help sandkastele bou het,
die smaak van kleinkoekies en vars vis,
mossels en jellie en waatlemoen,
kaastoebroodjies en soet tee

ek sien haar hande wat vou en sorteer,
optel en platstryk en regtrek,
trane afdroog, pleisters plak en troos,
groeipyne geduldig wegvryf,
seer spiere insmeer na sportdae
en haar koel palm teen ‘n koorsige voorkop

ek streel oor die bekende lap
van haar middernagblou bloes van sy
wat soos water deur my vingers glip,
haar sagte japon, haar woljas
en voel liefde in elke vou, in elke draad

dit bekoor my oor en oor dat sy telkens
so sag besit van elke seisoen kan neem

© Hester Steenkamp, 2026

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag