Anne-Marie Kotzeé
Lees meer oor Anne-Marie Kotzeé
BRONSKLAS
DESEMBER 2023 – VELDSLAG PROJEK
1.Die geveg is nie myne nie
Jy het gesneuwel in die voorste linies van die kankeroorlog
en ek was onbewus daarvan dat ek die ossewalaer
stywer om my moes trek om die giftige pyle
van hulle bitter woorde af te weer
Vasgevang in my eie rou
het ek oopoë in die lokval ingeloop
Vrydag die 13de Junie 2014
skaars 40 dae na julle seun se dood –
onvoorbereid op die hanskakies in my geledere
wat onheilspellend lê en wag vir die regte oomblik
sodat die verrassingsalvo van ongekende haat en bitter woorde
‘n pad van verwoesting kon oopbrand in my siel
terwyl sy stem met rou donker emosie
voortdonder soos ‘n ou sanna sonder genade
om my skild van onskuld aan flarde te ruk
En tog het ek opgestaan
uit die veldhospitaal van vergifnis
en my kinders toegelaat om steeds
kamp op te slaan saam met julle
in nagedagtenis aan hulle pa
En nou staan ek weer op die vooraand van ‘n veldslag
en ek besef …
Hierdie oorlog sal ek nooit wen nie
want aanvaarding is nie deel van julle arsenaal nie
en liefde en omgee is nie ammunisie wat te koop is nie
Met ‘n laaste terugblik
laat ek die oorlogsone van sarkasme
en gesneuwelde verhoudings agter my
om kaalvoet oor die berge te loop
op soek na ‘n nuwe beter more
Anne-Marie Kotzeé
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...