Reis lig

In een van my hart se kamers

staan baie tasse in ‘n ry.

Met party wou ek net wegloop

en met ander, langer bly.

 

Eenkant staan ‘n groot tas,

Een wat ek nooit aan raak.

Die bubbele slot en ketting

is ‘n doelbewuste saak.

 

Die rooi tas het jou naam op

en binne, al die seer,

al ons mooi herinnerings

en die lesse wat ek moes leer.

 

Ná jou, reis ek baie ligter.

Geen tasse dra ek saam.

Net ek en my piepklein rugsak

in my solo-wentelbaan.