Roos van Saron

Hooglied – Lied der liedere

lied der liedere
ʼn Hoogliedsgesang
pryse aan ware liefde
in blom se kroonblaar-bloswang

geure van intense vreugde
soos lelies van die Goddelike veld
lokkende liefdesaromas
van Maria as mistieke roos vermeld

gespreide bloemvlerke
van die Bybel se trooskuur
kalmerende geure op aandlug
soos engelboodskappe gestuur

al is roosbome afwesig
in die kaal avonduur
krans steeds ʼn kroon van vele rose
sonder doring se skuur

rozenkrans se meditering
wat vele twyfels verwerp
op die geure van geloof
sal essensiële olies verskerp

die blom van God’s liefde
in passie en opoffering
teen aarde se kwaad en skaad
deur bloed se rooi beskerming

knopknoetse uit Son gebore
en in Sy tyd oopgevou
uit kleurblaar in skeppingslae
vir die bewonderaar se onthou

gul geestelike wysheid
in die simboliek van ‘n blom
ons lewens geparfumeer
soos die heiland wat kom

in kosbare salfolies
gefiltreer en vergaar
maak jou kruis op my voorkop
as’ k in jou blomtuin baljaar

sterk soet geure van die roos
bring soetheid van liefde in gedagte
herinner die mens in blom se prag
aan almag-God se essensie en kragte

pienk roos stuur jou boodskap
van vrede en dankbaarheid
jy is die boodskapper van God
blosend en pragtig in stil heiligheid

*”Ek is ’n roos uit Saron,
’n lelie van die veld!
Soos ’n lelie tussen doringbosse,
so is my beminde tussen die ander meisies.
My liefling is vir my soos ’n appelboom
in die boord tussen die ander jong mans.
Om onder sy skaduwee te sit,
is vir my pure genot
en sy vrugte is soet in my mond.”

Etna Wepener ©️