Brille, pille en sonbesies

Dis ‘n tyd al dat ek wonder
oor skete en grille
en hande vol pille
wat eendag ongenooid
aan mý deur mag klop…
…my ore hoor lankal
net wat hulle wil
as my stilte versteur word
verdoof my binneoor stil-stil.

Teen die wasige woorde
van my storieboek
het ek my blind gestaar
tot ek later, totaal verslane
die oogglase ook moes aanvaar
maar, het jy al ooit gehoor
hoe sonbesies jou siel
genadeloos deurboor
en jou vrede dag en nag
met skrille marteling vergoor;
tot jy eendag (on)kapabelmal
die spreekkamer binneval
en Dokter die gekke gesuis
van sonbesies in jou kop
sommerso met hipertensie-
en-kannie-warrie-pille stop…?