Skuddende woorde

Sy eerste woorde
aan menige siel
weergalm nog deur die eeue

dit was nie ‘n eindelose lys
van dwingende voorskrifte nie

nie ‘n katkisasieboek vol leerstellings
wat haarfyn bestudeer moes word nie

nie ‘n goed geformuleerde
sondaarsgebed wat moes red nie

selfs nie ń eksakte geloofsbelydenis nie
– dié sou later
padlangs en spontaan
sy weg deur hart en lippe vind –

dit was ook nie ‘n mond vol clichés
soos kodetaal van ‘n klub nie

maar ‘n uitnodiging
gegrond in eenvoud
wat lewensreisigers daag
om te waag

tot ‘n nuwe manier van wees

– volg my –

-cs-feb-2023-