Verlangevlug

my gees sweef op die blou-blou strome
van haar lug in my verlangevlug
rooibruin duine kontoer haar some
uitgestrekte Kgalagadi-drome kruin terug

duinebesies sing hul Kgalagadi stem
wyl geitjies blaf-blaf draf oor haar duine
waaisand Jakkals-tjank die wind se stem
hiëna koggel-lag maanhaar se brul-seine

wolkies stof plof dof onder gemsbokpote
Kgalagadi-kudde drink waar watergate blink
duineveld huppel-dans deur haar dorre slote
waar die reën sy sjampanje oor haar skink

my oë proe haar lippe in die rooi van elke sooi
geskakeer in derduisende korreltjies sand
voel haar reuk in elke plooi
saggolwend wildebees Kgalagadi-duineland

nardusstrale somerson lint in die wind
vlug voor die koue strome in die lug
waar kameeldoring hardekool-vrede vind
kaalvoet oor die duine spoor my geestesvlug
(©Pieter Mostert)

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag