verwagting in die skemeruur
wanneer tagtig somers oor jou skouers vou
en jou helder gees steeds ver en wyd kan kyk
terwyl die brose lyf se krag terug begin klou
verander jou horison van tyd tot tyd
vooruitsig word nie meer in lang, vol jare gemeet nie
maar eerder in die sagte ritme van ’n maand of week
terwyl elke dag wat telkens as nuwe lig gegee word
skaars word soos ’n kosbare geskenk versteek
met elke onverwagte terugslag of nuwe pyn wat kom
krimp die toekoms verder tot in ’n klein vertrek
tog bring hierdie skemerkamer ’n diep, suiwer glans
oor elke klein detail wat vroeër dalk versteek was
nou kyk jy met nuwe oë na die wêreld om jou heen –
na hoe ’n voël sy vlerke teen die oggendlig oopvou
na hoe die wind deur jou boomtakke ruk en pluk
alles dra nou ’n dieper merk van liefde en vertrou
meeste irritasies van die lewe val soos dorre blare af;
jou hart word sagter, warmer teenoor elke medemens
ook in die sagte aanraking van jou naaste bloed
ervaar jy nou die hoogste vorm van aardse vreug en wens
soms is daar weemoed en stille trane wat soms opwel
die fluistering in jou binneste wat vra vir net nog tyd –
om miskien nog een seisoen of mylpaal saam te kan beleef
nog ‘n tydjie vas te hou aan die aardse mooiheid
tog staan een groot waarheid vas soos rots in hierdie uur:
die presiese dag en oomblik bly vir jou ’n geslote boek;
geen mens sal ooit sy laaste asem op ’n kalender skryf
of dalk die presiese oomblik van sy vertrek kan weet nie
vir die hart wat diep gewortel in geloof bly staan
bring hierdie onbekende uur geen vrees of donker skrik;
om te sterf word nie as ’n wrede eindpunt aangesien
vel eerder sy stille deurgang na ’n hoër, ewige geluk
soos Paulus steeds met vaste sekerheid getuig:
is elke ekstra dag op aarde ’n genadige gebaar
vir jou om die aardse tent finaal te kan verlaat
uiteindelik ’n wins – om tuis te kom by Hom daar
leef jy dan in spanning tussen hartseer en dankbaarheid
met oë vol verwondering oor elke dag wat nog mag kom
mag jou siel rustig wag op daardie laaste, sagte roep
reg om hier te bly, maar net so gereed om te gaan
© Tearlach.
Maak 'n opvolg-bydrae
Jy moet aangemeld wees om 'n kommentaar te plaas.