79 Die “requiescat”
79 Die “requiescat”
Die “requiescat” is ‘n tipe elegie en ‘n liriese digsoort waar die inhoud die vorm bepaal, maar anders as ‘n gewone elegie wat bloot ‘n roudig is oor ‘n afgestorwe geliefde, (wat gewoonlik hartseer, eensaamheid en pyn uitdruk) is die “requiescat” is ‘n wens of gebed vir ‘n dooie mens om tot rus te kom.
Dorothy Parker se gedig “Requiescat” se slot versreëls is baie amusant waar sy God vra dat daardie persoon nie weer moet verrys nie. Sy het die manier om in dit wat bisar is die amusante te sien en is uiters skerp met haar woorde. Oscar Wilde se gedig “Requescat” is ook ‘n goeie voorbeeld van hierdie soort versvorm
Hier is my gedig wat ek as ‘n “requiescat” geskryf het:
Vêr te lank het jy in my drome in gedwaal (requiescat)
Vêr te lank het jy in my drome in gedwaal
maar vannag met hierdie silwer maanskyn
wil ek jou uit my dryf,
alhoewel ek jou mis, bid ek vannag
terwyl die son sterf in die weste
dat vrede en saligheid joune word,
in liefde vra ek jou om te rus
in hierdie wêreld se duister ure
en as God weer kom
dat Hy jou in geregtigheid opwek,
die wolke maal en ek ruik reën
maar daar is slegs stilte en duisternis,
as die ure verbygaan en moegheid my vind
word slaap ‘n soort toevlugsoord.
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...