80 Die Kimo
80 Die Kimo
Die Kimo is ‘n digvorm wat na die haikoe in Israel ontwikkel het en is soortgelyk aan die haiko, maar dit bestaan uit drie versreëls sonder volrym met 10, 7 en 6 lettergrepe in die drie lyne.
Hier is my poging tot ‘n klompie kimo gedigte::
Kimo’s oor die natuur in die stad
Die donder vertak, knetter blouwit neer
op die binne oog is daar
God se krag afgedruk.
*
By die ou dam kring reëndruppels rond uit,
voor ‘n vis goud glinsterend
deur die oppervlak breek.
*
Met die eerste koue stortbui wat val
sis stoom in spierwit wolke
wat na die hemel tas.
*
Geen padda wat kwaak of kriek wat skril skreeu
is hoorbaar bo die lawaai
van ‘n trein en lorries.
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...