Jongste aktiwiteit:

97 Die Trijan Refrein
vir

97 Die Trijan Refrein

97 Die Trijan Refrein

Die Trijan refrein wat geskep is deur Jan Turner bestaan uit drie nege versreël stansas, wat ‘n totaal van sewe en twintig versreëls vir die hele gedig maak. Die eerste versreël is identies in al drie die stansas. Die woorde wat die eerste vier lettergrepe van die vyfde versreël vorm word herhaal as ‘n dubbel refrein in versreëls sewe en agt. (Wat mens nogal herinner aan ‘n rondeau tipe gedig. Versreëls wissel ook in lengte tussen agt en ses lettergrepe met rymskema. Jan Turner se gedig “Sweet Destiny” is ‘n baie goeie voorbeeld van hierdie versvorm.

ababccR1R1c / adadeeR2R2e / afafggR3R3g (Soos gewoonlik dui hoofletters presiese refreine aan)

Skematies lyk die rymskema soos volg:

x. x. x. x. x. x. x. a.
x. x. x. x. x b.
x. x. x. x. x. x. x. a.
x. x. x. x. x. b.
R. R. R. R. x. x. x. c.
x. x. x. x. x. x. x. c.
R. R. R. R.
R. R. R. R.
x. x. x. x. x. x. x. c.

x. x. x. x. x. x. x. a.
x. x. x. x. x d.
x. x. x. x. x. x. x. a.
x. x. x. x. x. d.
R. R. R. R. x. x. x. e.
x. x. x. x. x. x. x. e.
R. R. R. R.
R. R. R. R.
x. x. x. x. x. x. x. e.

x. x. x. x. x. x. x. a.
x. x. x. x. x f.
x. x. x. x. x. x. x. a.
x. x. x. x. x. f.
R. R. R. R. x. x. x. g.
x. x. x. x. x. x. x. g.
R. R. R. R.
R. R. R. R.
x. x. x. x. x. x. x. g.

Hier is van my pogings tot die Trijan refrein:

As boomtakke teen die dak skuur (Trijan refrein)

As boomtakke teen die dak skuur
trippel die klein tiptol,
gedurende die middaguur
in die poel waar hy dompel rol
vlerke uit stryk en reguit klap
ewe kordaat op en af stap
vlerke uit stryk
vlerke uit stryk
as hy heen en weer begin trap.

As boomtakke teen die dak skuur
waai daar ‘n ligte wind
brand die son warm soos vuur
roep die oorkantste kind,
kom die middag met sy vrede,
gedagtes uit die verlede
kom die middag,
kom die middag
en vergeet ek soms die hede.

As boomtakke teen die dak skuur
trippel voëls oral rond
as die oomblikke dralend duur
blare waai op die grond
dink ek aan God of Hy hier is
bring skadus ‘n soort lafenis
dink ek aan God,
dink ek aan God
en vind ‘n diep betekenis.

Bo die afdak, bo die winterstoep (Trijan refrein)

Bo die afdak, die winterstoep,
is daar ‘n jong bosduif
wat gedurig na sy maat roep
en as die deur oop skuif
sien ek spikkels bo op sy bors
en les hy by die poel sy dors,
sien ek spikkels,
sien ek spikkels
wat blink, as hy skrik blaf hy nors.

Bo die afdak, die winterstoep,
ritsel die eikeboom
en dan hoes my ma van erg kroep
waar sy soms sit en droom,
vlam die sonlig skielik warm op
en ek hou haar liefderyk dop,
vlam die sonlig,
vlam die sonlig
asof ‘n veldbrand verby galop.

Bo die afdak, die winterstoep,
pik daar ‘n swerm mossies
kom land duiwe soms in ‘n groep,
hoor ek ma soms hard nies;
is ek vasgevang aan ‘n soort hoop,
weet ek dat tyd nou reeds uitloop
is ek vasgevang,
is ek vasgevang
voel my lewe soms uitverkoop.

Die groenspreeu (Trijan refrein)

(na P.W. Buys)

As jy vir die groenspreeu aanskou
skreeu hy uit die lang gras
glinster hy groen in die môredou,
en vang hy jou oog vas,
en peul hy uit ‘n gat, ‘n boom,
pik insekte by ‘n klein stroom
en peul hy uit
en peul hy uit
asof gevang in jou dagdroom.

As jy vir die groenspreeu aanskou
vonkel hy hier en daar
asof hy soms strale vashou
en tierelier hy maar
strek hom lank uit onder die son
aanskou dit as ‘n rooi ballon
strek hom lank uit,
strek hom lank uit
en hy sou weg vlieg as hy kon.

As jy vir die groenspreeu aanskou
pik hy in die suring
as hy soms ‘n groot wurm vasklou
voor hy ‘n loflied sing,
fladderend vlieg, sy vlerke sprei,
oomblikke jou aandag aflei
fladderend vlieg,
fladderend vlieg
en so swiep ‘n môre soms verby.

[Verwysing: “Groenspreeu” P.W. Buys.]

Dis of die see voor ons bly breek (Trijan refrein)

Dis asof die see ingeperk
voor ons bly breek en slaan
en netso ewe ongemerk
bly jy hier by my staan
waar die see strek tot in die blou
en ons mekaar doodstil aanskou
waar die see strek
waar die see strek
en ek jou in my arms toe vou.

Dis asof die see ingeperk
in hierdie klein baai is,
en ons buite ‘n haai opmerk
maar geen betekenis
behalwe ons liefde wat bly
net mooi niks as net ek en jy,
behalwe ons,
behalwe ons
maak hier nog enig sin vir my.

Dis asof die see ingeperk
altyd hier bly uitspoel
ons hier bly nader trek
ons grootse en diep dinge voel
asof God self tussen ons is
ons aanskou met ‘n groot deernis
asof God self,
asof God self
ons hier bring tot betekenis

Met ‘n dreungeluid bars golwe (Trijan refrein)

Met ‘n dreungeluid bars golwe
onder die Waenhuiskrans
word daar in gedolwe
as reuse branders draai en dans,
soos wit sterre en magtig breek
alles met diep water nat week
soos wit sterre,
soos wit sterre
net voor die nuwe rooi dagbreek.

Met ‘n dreungeluid bars golwe
diep uit die donker see
soos ‘n trop knaagende wolwe
wat nie gebied afgee
hamer die water gedurig aan
waar dit hard teen rotse vasslaan
hamer die water
hamer die water
tot dit by die grot self ingaan.

Met ‘n dreungeluid bars golwe
slaan hul moker houe
netsoos uit duisende kolwe
in die rots se voue
en vasgevang staan ek en jy
waar ons ‘n skouspel te sien kry
en vasgevang
en vasgevang,
magtig swiep die blou see verby.




Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...

Up
Top Ranked Users

[joinup_core_top_members columns=”1″ space=”no” max_members=”3″ behavior=”columns” columns_responsive=”predefined”]

Activity Feed