Pou se veer

Pou se veer

 

Kleure van goud,

groen en blou, ‘n oog

wat gevaar weg hou.

 

Trots pronk hy met sy groot waaierstert,

wetend hy is sterk.

 

Ander dra ‘n pou se veer in sy hoed, en eens was die veer

gedoop in ink.

 

Sou die veer ons iets kon leer, sou dit dalk wees:

 

Daar is altyd ‘n groter een wat alles sien, wat woon in die land van goud.

 

Blou gee hoop vir ‘n nuwe dag, en groen beloof ons altyd

nuwe groei.

 

Mag ink nooit ophou vloei om te deel

en te seën vir hulle

wat innerlik bloei.

 

Ink wat troos en saam kan lag, ‘n les kan leer, of selfs net

terug kan gaan

na gister se dag.

 

©️ Ryno du Plessis 2026