Na soveel jare

Na soveel jare…

 

Ons was in die paddaklas,

dit kan ek nog goed onthou.

 

My klei was geel,

joune blou.

Jy het ons nog

smaaklik aan dit laat kou.

 

Die ander kinders

was vir ons te veel.

In ons eie wêreld

het ons gespeel.

 

Die grootmenswet

het my beste maatjie

by die skool kom steel.

 

Die son het verdwyn.

Geen maatjie meer

om mee te speel nie.

 

Sou ons net weer

eenkeer kon wegglip

en by die groot kinders

se kant gaan speel?

 

Na al die jare

vind ek jou weer.

Jy is nou

‘n Weskusnooi.

 

Ek is weer terug

hier waar ons eens was.

Ek ry soms nog verby

die paddaklas.

 

Gelukkig,

deesdae sonder enige vrese

oor wat van Celeste geword het.

 

Voor jy vanaand gaan slaap,

wil ek net weer

dankie sê

vir die skaap…

 

Was dit nie vir Celes die skaap nie,

sou die lewe ons dalk

vir altyd weggeruk het.

©️ Ryno du Plessis 2026