Sou jy raak kon raai
As twee verrimpeld’ ou hande
bloubleek oorkruis loop lê
sou jy dan raak kon raai
wat ek onder die wilger wou sê
Ons deurtrap tweespoor voetpad
langs die oer-roes windpomp
dan steil op teen die rant
my hande in joune gekelk
toe jy jou hart aan my verpand
Waar seemeeue kras op dek sou skree
soutsproei egalig deur hare vloei
sou jy speels met wysvinger
‘n traan van my wang wegvee
Daar waar die visarend
vryvlerk wind-swiep
die wind sy eie melodie blaas
het tromme van hartdromme
luidkeels saamgeraas
Maar hier is ‘n kinkel in die kabel
want haar siel is nou vervreem
vasgevang, ver weggeneem
dus bly hierdie dan net ‘n fabel
Evelyn van der Merwe
Ek skryf om leeg te word van wêreldse struikelblokke en voller te word met die talent wat my Skepper aan my toevertrou het. So glo ek dat mens tree vir tree en woord vir woord eendag weer oorwinning sal behaal.
1 Kommentaar
Maak 'n opvolg-bydrae
Jy moet aangemeld wees om 'n kommentaar te plaas.
neels
Pragwerk en n pragfoto om hierdie werk te komplimenmteer Evelyn