Waar vrede rus
Waar Vrede rus
Lê my sagkuns neer
neffens die ou treinspoor.
Daarlangs het ek my lag
al toeka se tyd verloor.
Of tussen haelwit lakens
styf gespan op wasdag –
wat wit wapper vir versoening
waarop ek nou nog wag…
Ek jaag die vrede na.
Dit blý kortstondig rus
in die stof van ‘n ou dieseltrekker
wat die barre aarde kus.
Vlugtig, split sekonde
probeer ek dit raakvat,
maar dit dartel na benede
en ontwyk weereens my hart.
Helaas kyk ek na binne.
Hoe kon ek dit dan mis!
Vrede’s waar my woorde opraak
en Vader álles is.
Maak 'n opvolg-bydrae
Jy moet aangemeld wees om 'n kommentaar te plaas.