Wederkoms .

ek kom weer as dit lente in jou Kaap is
op ‘n dag wat dit sag oor wingerd reën
en ‘n koor van duisende oggendvoëls
jou nuwe dag met môrelied’re seën

wanneer Karoobos ‘n bietjie minder vaal is
en jou Tankwa haar kleureskouspel kry
die wagter sy skape bymekaar maak
en hul weer na stille waters lei –
dan kom ek weer

ek kom t’rug as jou berge weer geboorte gee
aan watervalle en riviere vol in vloei
as jou woestyne veel minder droog en dor is
en aronskelke langs al jou strome bloei

ek sal daar wees as jou brande nie so woed nie
jou vure blus, en jou vlamme ophou skroei
as die hitte van jou stryd nie meer verwoes nie
en jy verstaan – hoe ‘n hart se lamp moet gloei

. . . dán kom ek weer

© C. Shaw
31 Januarie 2017

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag