La vita è bella
‘n jongvrou het om middernag
in die strate van Parys
kaalvoet deur die dorp geloop
die lug was koud –
soos ys
haar rok het oor die grond gesleep
(in koningsblou fluweel)
terwyl sy op haar ou kitaar
‘n lank vergete wysie speel
daar was sterre in die hemel
en die maan was ambergoud
al was die nag so donker
en al was die nag so koud
haar hare’t oor haar rug gegolf
(deurvleg met slierte lint)
en die lig van elke straatlamp
het koperglans daarin gevind
*
dit was amper Mei-maand
en die Vrystaatnag – soos ys –
was bittermooi op ‘n herfsaand
om middernag . . .
in Parys
© Carma Shaw
Viooltjie
Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat te sê het, en dat julle lekker saam sal lees :-)
4 Kommentare
-
-
Viooltjie
Baie dankie vir die saamlees en kommentaar, Neels :-)
-
-
Kiekies
Ek was eers in die strate van Parys in Frankryk, maar toe sien ek ek het verdwaal. Ek moet terugkom. Vrystaat toe. Maar die prentjie wat jy in my gedagtes geskilder het was nog net so pragtig!!
-
Viooltjie
Baie dankie, Kiekies. Ek is bly dat jy saam verdwaal het. Dankie vir die kommentaar :-)
-
Maak 'n opvolg-bydrae
Jy moet aangemeld wees om 'n kommentaar te plaas.
neels
pragtig soos altyd Carma