affair in blou (BRONS)

affair in blou

my beminde – my bloudam
met jou bruisende borrelblou branders
betower jy my en verower jy my
keer-op-keer met jou diepblou brander-oë

my beminde – my bloudam
jy verlei my en maak my knieë lam
jy skitter soos kobaltblou saffiere
in maanlig as jou water-arms my uitlok

my beminde – my bloudam
so imposant soos jou naam Oceanus
verkondig jy in ʼn hemelblou simfonie
my liefde vir jou – my blou affair …

©️Marlene Erasmus
21/09/2020