Apollo 11 Retoer

(Met apologie aan DJO)

Een klein tree vir die mens, een reuse sprong vir die mensdom.

 – Neil Armstrong  20 Julie 1969

Die partytjie jil in jolige rumoer

weergalm guitig tot diep in die nag,

hul vier die Apollo 11 retoer

en die mens se nuutverworwe mag.

Daar is geskerts, gedrink, gelag

op ‘n duikplank en in die kroeg,

gedans, hoe later hoe kwater gefuif

en dronk van hoë balkonne af gewuif.

Langs die swembad met glas omhoog

roep ‘n man, kyk, ek loop op water.

Swaartekrag het almal, koel gespat, laat skater.

Die wetenskaplike wat die woord moes voer,

wou sy blote insig met die mense deel

maar is so-ewe deur joel en jool afgesnoer.

Dronkverdriet en dreunende jolyt

soos seekat-arms dwing oral in en uit

en bikini’s wat boesemloos, bedees

in die spa-bad tuit.

* * *

Bo die bleek horison hang

die maan, sonder wolke & naak,

wat in stilte sit en soos ‘n monnik

oor sy asemhaling waak.