beterweter (Goud)

by uitstek is daar mense wat altyd beter weet

en nie skroom om die sin …laat ék jou vertel…

te gebruik vanaf hul denkbeeldige seepkissies nie

 

dit klink asof hul alomteenwoordig moet wees

by al wat ‘n gebeurtenis is

want Verteller begin nét praat, met almal aan sy lippe

 

of Beterweter vat die aas en swem met die storie weg

en die rivier waarin als as die heilige waarheid begin het

word ‘n stormagtige see waarin Beterweter se béter storie

 

hoogtes bereik waarby niemand kan uitkom nie

en Verteller en gehoor verdwyn

in die vertelling wat in ‘n eenpersoondrama ontaard het

 

beterweters is oral en hul elkeen glo vas

dat hulle altyd reg (en onbetwisbaar)

dié een moet wees, wat vir ánder vertel…

© Elmarie Nienaber Van Kampen, 2026