Welkom, Besoeker
Welkom, Besoeker
Taal waarskuwing*

Titel: Digdood (Silwer)

Deur Seirdna
Datum gepubliseer: 23 Maart 2021 Aantal woorde: 333 131 Kere gelees 6

“die meester kom sy kinders haal
op anderster maniere”
só het tant Skuitjie
daardie dag gesê

waar sy oor die wasklip buk
staan die are in haar nek
haar wange dril soos die uier
van oom Faf se jerseykoei
as dié saans afdraf stal toe
om met die melkman te gaan stoei

haar arms vryf egalig
om die wasgoed wit te was
sy tuur in die waswater
soos ‘n siener in die niet
en deel haar wysheidwoorde
soos die seeman in sy lied

hy sing van vissermanne
wat soos stippels in die seë
teen die golwe se geheime
‘n lewensstryd betreë

hy sing van dapper jongens
met families by die huis
oorgegee aan waagmoed
en die diepsee se geruis

vandag praat tant Skuitjie effe anders
met ‘n sug in haar gemoed
oom Frans se digterdood
maak die beste moordslag goed

hy’t dan half verstik in sy eie gedigte
so sê sy laaste doodsverslag
die howe het die detail
in die fynste fyn betrag

dit het begin by ‘n sonnet
as ‘n Italiaanse een geboek
dié steek toe in sy keel vas
soos ‘n droë stuk wortelkoek

die haikoe en die tanka
het ook bokkerol gehelp nie
en soos ‘n ware virus uit die ooste
nie ‘n teenmiddel gehad nie

toe hy die sonnet wil afvorseer
met ‘n woordeboek gedig
kry sy esofagus skade
en raak hy blou in die gesig

met die gehoes en die geproes
gryp hy ‘n limeriek
en lag so vir die woorde
hy word nog verder siek

‘n vrye vers konkoksie
het die nekslag toegedien
‘n kleinletter beroerte
met ‘n versklont deur die brein
bring sy hart in fibroalliterasie
en assonansieer sy laaste skyn

sy gedigte was te vaal
rigied en stereotiep
het die lyksverslag laat blyk
“te min geskryf oor water en sy tuin;
te veel oor klagtes, dood en pyn”

Tant Skuitjie hang die wasgoed op
en loer half onderdeur die draad
“vreemde maniere sê ek jou
en die meester kyk na élke daad!”

A Fourie (Seirdna)
2021.03.11




TEMAS
1 Kommentaar
  1. Anze

    24 Maart 2021

    Pragtig, baie dankie vir jou bydrae tot die Maart 2021 – OOP-projek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 54
Kommentaar telling: 86

Gebore in Oos Londen; Grootgeword in Steynsburg Noord-Oos Kaap. Getroud  3 seuns, twee kleinseuns en 'n kleindogter. Van kleins af lief vir skryf. Opstelle was my ding en ek was nog altyd versot op die digkuns. Mal oor sport; het van jongs af briewe vir die Springbok rugbyspelers geskryf en hul handtekeninge versamel. Het later self provinsiale rugby vir die destydse Transvaal (Leeus) gespeel en saam met my ou skoolhelde soos Kevin de Klerk op die veld gedraf. Het Dr. Craven ontmoet en in 'n Curriebeker eindstryd gespeel. Dit was ongelooflik. Daar is twee diersoorte wat deel is van my lewe en vorming nl. perde en honde. Perde is sus en honde is so, beide wonderlik in my wese ingegrafeer. Geen gedig kan die perd se grasie en prag, of die hond se liefde en toewyding genoeg vereer nie. Die digkuns trek my soos 'n magneet. Ek wil dig oor alles om en in my, met ritme en rym. Sou hierdie talent my onderskei; wil ek dit aan my Heer toewy en gedigte skryf met 'n kwinkslag ,wat dalk die dissipels laat lag en hopelik miskien eendag in die hemelse biblioteek geag en gelees word.      

Horison Media

AfriForum – Trotse borg van INK dig/skryf kompetisie

FAK – Trotse borg van INK dig/skryf kompetisie

Die Afrikaanse Taalmuseum & -monument – Trotse borg van INK dig/skryf kompetisie

Gebruikers Aanlyn

1 Lid, 137 gaste aanlyn

Bydraes – Argief