My siel wil tiekiedraai

Wanneer ek droom
in ’n ander wêreld gaan dwaal
vind ek my gevlerkte siel
besig om vrylik te baljaar

ek kan kaalvoet tiekiedraai
in ’n kleurvolle heide, behae
omring met lewensblomme fraai
heerlik, drentelend in loskommer dae

swewend op maat van eolusharp
verkennend in dwarrels van my brein
my siel onbevange vry
huppelend op weerklank van liefde

ek wil vingerstreel oor glimlag van lewe
sterre een vir een aansteek
uitdagend tongstrek vir blaf van lewe
swem in poel van stilwees tot dagbreek

dan … ontwaak kleurvolle horizon
my siel verdwyn in helder newels
hartseer hunker ek verlangend
na my verlore siel.

© Taai Bonthuys

Neologismes
loskommer = kommervrye
tongstrek = tong uitsteek
dwarrels = gedagtes