Nonsens

 

 

“Nonsens ,moenie die meeue pla nie –

Nonsens, gaan lê nou stil man”

 

Nonsens was die naam van ’n hond

soms het Nonsens sy naam behoorlik uitgeleef

vele male moes hy maar gedweë, druipstert vlug

want Nonsens was ’n Jack Russel- brakkie

die hart van ‘n leeu gebêre in ’n piepklein lyfie

hy het my dikwels verras met sy beskermingsdrang

mense sê altoos: blaffende honde byt nie

maar hulle het nooit vir Nonsens geken nie

as dit volgens hom moes gebeur, kon hy geniepsig wees

Nonsens is ook al lankal gebêre onder die sand

daar waar ons die kaapse kobra gesien het

reg langs die see by die Chubb se verlate strand

maar sy nonsens – herinneringe het nog lank

nie heeltemal gaan lê nie

dit staan op soos wind

in my gedagtes

en drome

 

© Tearlach.