Ope geheim

Hoe wonderbaar is tog die reis
van aardse sielsgenote
Hoe bittersoet die liefdespys
so terminaal gegote

Hoe min sal saam te sterwe kom
die dood sal een afskei
die ander leer die somber som
daar’s een wat agterbly

Die bittereinder se verhaal
geskryf meer as gelees
is eintlik maar so doodnormaal
kan tog nie anders wees

Die doodlooproete van die gade
maak eindelik tog sin
Uit sterwensleed verrys genade
wat reik na oor begin