Soos mis

Hoe kan jy my kwansuis maak glo
dat liefde oneindig is?
Netsoos die uitspansel daarbo;
eindeloos en grensloos
(soms roekeloos)
soos die loop van die suidoos

Tot teenaan my hart se deur
jaag jy die son en die maan
met blink beloftes agterna,
’n magdom sterre in kardoese
word ook hoopvol aangedra

Maanskyn en rose
kersieliefde vuur en vlam,
deur jou hipnose ingetrek
lê my verstand eenkant verlam
bedot
bedinges
bedenklik

uitgelewer aan liefde
wat soos vroegoggendmis
ewe vergangklik is

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag