My kanna in Kappadosië – Eduard Smith

Selfs ‘n kannabos in Kappadosië
sal nie so behaaglik soos jy kan wees nie.

Hulle wat dink hul weet
wat en hoe die liefde moet kontoer
dra geen benul
van die landskap en kringpad
waar ons mekaar
dor en dors gekry het nie.

In die amperwoestyn,
met aortas afgebind
deur sogenaamdes,
daar, net dáár het ons
mekaar gekry en bevry
met vonkelnuwe teue.

Daarom, vir my
sal selfs ‘n kanna in Kappadosië
nooit so mooi soos jy kan wees nie.

©Eduard Smith 2020