‘n Wagtende vriend (Goud)

my huis staan vas, ’n wagtende vriend

met deure wyd oop soos arms wat jou innooi

die lang gang, ’n pad van fluisterende voetstappe

eggo met die ritme van my hart se klop

die dak is gemaak van drome – hoog en wyd

beskut my teen die lewe se woeste storms

die vensters glimlag na ’n ster-belaaide nag

met ’n uitsig op beloftes van môre wat wag

in die voorkamer hou ’n stoel nog wag

waar middagson oor die leuning lê

die kombuis praat in tale van vars gebakte brood,

gemeng en geknie in meel en oggendlig

my tuin, ’n laslappiekombers van groen

is ’n stil getuie van seisoene wat kom en gaan

my huis staan vas, ’n wagtende vriend

my skuilplek van krag – dag na dag

©MarleneErasmus