Die Passie van Himeros
Die passie van Himeros*
Hy voer haar met dadels en heuning
en balsem haar son-bruin lyf
met reukolie en nektar.
Lê haar neer op die altaar van sy liefde
en laat haar lang donkerhare soos
‘n sluier oor die klippers van sy hart hang.
Hy bedruip haar met die heilige water
uit die stroom van liefde wat hy diep
in die reënwoud gaan skep het.
Plaas sy hande in seën
oor haar deinende heuwels
laat die soel herfsbries
in haar oor fluister van liefde
en maanligrose en hande
wat haar sal dra en beskerm
en ‘n hart wat haar veilig sal hou.
Dan salf hy haar met die passie
van Himeros in oorgawe as hulle
die paradys van hulle eie vergetelheid betree.
Hy sing vir haar liefdes-odes
sonder woorde of musiek
en sy hoor die fyn suiwer klanke
van sy liefdesverklaring as haar
brose lyf saamsmelt met syne.
© Christo Younis du Plessis 15 September 2015
*HIMEROS (of Himeres) was die god van seksuele begeerte, een van die jong Erotes (Gevleuelde Liefdes-gode) –
Christo
Deur woorde raak mense mekaar aan. Lees hou my gedagtes soepel om te kan skryf.
5 Kommentare
-
Anze
Briljant!!!! sensueel en ongelooflik mooi
-
Koekekranka
Die erotiek baie sinvol en kunsvol bedink en aangebied. Pragtig!
-
Inkmoderator
Die Griekse mitologie inspireer maklik en bied gevolglik goeie versmateriaal. By die titel het ek gedink dit sou dalk 'n vers oor hierdie gevleuelde liefdesgod wees, maar is toe verras dat die karakter in die vers slegs die passie van Himeros as onderliggende verwysing gebruik. Dit is slim. Dit bring 'n varsheid na vore. Ek dink wel dat die woord 'liefde' in die vers steurend herhaal word en is seker jy kan goeie en gepaste sinonieme vir die emosie vind. Sommer so uit die vuis kan ek dink aan: omgang, toewyding, oorgawe, geneentheid, gehegtheid, om maar 'n paar te noem. Verder, sou die vers funksioneel (of eerder tipografies) beter lyk indien jy dit in strofes verdeel? Ek dink tog so. Die inhoud van die gedig (alhoewel heerlik sensueel) is swaar en kan die leser na elke strofe asemskep. Ek help graag met meer as jy wil. Laat maar van jou hoor as jy iets wil aanpas en nie te seker is nie. Groete
-
Koos Elsum
Nou dis mos hoe dit gedoen word, gaan so voort. Waarom is jy so stil Ink & Afrikaans het jou nodig! Ek glo ook ons leer deur te ander te lees en kommetaar te lewer. Ek het onderneem om ń kommetaar telling teen 10% of beter vd aantal eie plasings te onderhou. Kan ek jou vra om dieselfde te doen en so die Ink ervaring te verryk vir almal.
Maak 'n opvolg-bydrae
Jy moet aangemeld wees om 'n kommentaar te plaas.
neels
Zym n absolute meesterstuk