glo wat jy sien

 

 

wat hy sien is vaag

deur ‘n waterige gordyn

verskuif sy sig van akwaties

na skitter helder verligte wêreld

verander sy rustige bestaan

in harde pynlike bestaan

om asem te haal

of te vergaan

 

onder klotsende skuim

vergaar skulpdiere sonder skulp

uitgespoel op harde sand-strande

soek dit oorlewing of herlewing

in die karige hulpmiddels

wat dobber en spoel

borrelende verstek

wegsak in sand

 

lewe is ‘n misgordyn

slegs sigbaar wanneer dit reën

sonder onverdiende seën van Bo

is daar geen veilige tuiskoms nie

geen hernubare groei sonder

herhalende genade

wat elke saadjie

laat ontkiem

 

hoe ver wil jy sien my kind

verstaan eers die realiteit om jou

al jou beskikbare hernubare bronne

jou verwysingsraamwerk van vriende

jou eie bloedfamilie wat jou ondersteun

kyk eers daarna na vandag se verhaal

en kyk hoe die deure oopgaan

van jou verstand en hart

 

Ó Tearlach.