Hoekom skryf ek?

Hoekom skryf ek?

As jy my sou vra: “Waarom skryf jy?”, dans daar baie emosies en idees deur my gedagtes. ʼn Dans waar my vingers oor my sleutelbord gly. Woorde wat uitborrel op rekenaarskerm of papier. Skryf bied vir my die geleentheid om myself te verwoord, my diep innerlike gedagtes, emosies en ervarings noop my om te skryf. Skryf is vir my ʼn intieme gesprek met my eie menswees en ʼn reis na die wese van my bestaan.

Kreatiwiteit is die krag wat my woorde laat vloei. Skryf bied aan my ʼn uitlaatklep waar ek verbeelding kan laat seëvier. In my woordwêreld is ek die argitek van my verhale. Elke letter op papier is ʼn kwashaal in die skildery van my verbeelding. Terwyl ek skryf eksperimenteer ek met idees, taal en skeppings om my eie stem te vind.

Vir my is kommunikasie ʼn fundamentele element van skryfwerk. Deur woorde te gebruik, bou ek brûe tussen my gedagtes en die wêreld om my. My pen is my wapen en my woorde is die ammunisie waarmee ek ʼn verskil probeer maak. Of dit nou is deur aktuele sake aan te raak of sosiale geregtigheid of net my menslike ervaring self, my doel is om ʼn impak te hê op die wyse waarop mense dink en voel.

Vermaak is ʼn universele roeping van ʼn skrywer. Ek wil graag my lesers wegvoer na ander wêrelde, hulle laat lag of hulle harte vinniger laat klop met emosies. Skryf is vir my ʼn magiese reis waar ek nie net die outeur is nie, maar ook die medereisiger van my lesers. Ek strewe daarna om reaksie by my lesers te ontketen, om ʼn beroering van die siel te wees vir die wat my in my woorde ontmoet.

Skryf bly vir my ook ʼn proses van persoonlike groei en ontwikkeling. In my geskrewe woord, in elke gedig, sien ek ʼn weerspieëling van my eie groei as mens en skrywer. Skryf bly my konstante metgesel op my pad van woordskeppinge.

Daar is ook ʼn aspek van ontsnapping teenwoordig in die skryfproses. Ek gebruik my woorde as ʼn instrument van bevryding, ʼn manier om van die seer van die lewe te ontsnap. In die wêreld van my verhale vind ek ʼn oase van vrede en rustigheid.

In elk van hierdie aspekte van my skryfwerk vind ek my identiteit en begrip van die mens se verganklikheid. Skryf is vir my nie net nog ʼn handeling nie; dit is vir my ʼn leefwyse, ʼn manier van bestaan. Deur my woordskeppings poog ek om ʼn boodskap oor te dra en om ʼn ryke erfenis van my gedagtes en emosies agter te laat.

My pen is nie net ʼn instrument nie; dit is my stem, ʼn sugting van my siel en ʼn onuitwisbare merk op die bladsye van my tyd hier op aarde.

©MarleneErasmus
29/11/2023
(471 woorde)

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag