Jolifikasie (Goud)

Die boordbome kon kwalik
hul skaterlag insluk
toe lente onthuts haar hande
oor die wind se tuitbek druk

genoeg is mos genoeg nou,
het sy beslis gesê
en ligpienk bloeiselsoene
op hul takke neergelê

sy’t loof met haar groen vingers
om die wingerdstok geweef,
en skielik was die groeiseisoen
oraloor fluks op dreef

die bont gesiggies in my tuin,
voorwaar ‘n ydel lot,
het goedig met die edelwit
van lelieblom gespot

geveerdes en gevlerktes
het die doenigheid beloer
en luidkeels uit die boomtoppe
hul goedkeuring gekoer

toe, met ‘n laaste moeë gaap
gee winter eindelik bes
hy sê daar’s nou géén salf te smeer
aan hierdie werfmoles!

©️ Elize Kruger
25 September 2024

Rapporteer inhoud

• Issue: *
  Kopiereg inbreuk vuil taal Ongeldige Inhoud
• Your Name: *
  
• Your Email: *
  

• Details: *
  

Handig verslag